வரும் சட்டசபை தேர்தலில் வென்று எப்படியாவது ஆட்சியை தக்க வைத்து விட வேண்டும் என ஸ்டாலினும், எதை செய்தாவது திமுக ஆட்சி அமைப்பதை தடுக்க வேண்டும் என அமித் ஷாவும் அரசியல் அரங்கில் காய்களை நகர்த்தி வருகின்றனர். 2011 சட்டசபை தேர்தலுக்கு முன்பாக திமுகவை தோற்கடிக்க முடியாது என்ற எண்ணமே பலரிடம் இருந்தது. அதிமுகவிடம் கூட்டணி வலிமையும் இல்லை. 2009 லோக்சபா தேர்தலில் அதிமுக கூட்டணியில் போட்டியிட்ட பாமக திடீரென திமுக கூட்டணியில் இணைந்தது. அதுவரை தனித்துப் போட்டியிட்டு வந்த தேமுதிகவுடன் கடைசி நேரத்தில் ஜெயலலிதா கூட்டணி அமைத்தார். இது பெரும் மாற்றத்தை ஏற்படுத்தி அதிமுக கூட்டணி மிகப்பெரிய வெற்றி பெற்றது. அதேபோல 2026 சட்டசபை தேர்தலுக்கு ஓராண்டுக்கு முன்பே, அதிமுக கூட்டணியை உறுதி செய்துள்ள அமித் ஷா, 2011ல் தேமுதிக போல இப்போது 8 சதவீத ஓட்டுகளை உறுதி செய்துள்ள நாம் தமிழர் கட்சி அல்லது விஜயின் தவெகவுடன் கூட்டணி அமைக்க முயற்சி எடுத்துள்ளார். இப்படியொரு கூட்டணி அமைந்தால் 2011 போல திமுகவை வீழ்த்தி விடலாம் அல்லது திமுக பெரும்பான்மை பெறுவதை தடுத்து விடலாம் என்பது அமித் ஷாவின் கணக்கு என பாஜவினர் கூறுகின்றனர். தமிழக அரசியலில் இதுவரை யாரும் எடுக்காத முடிவை 2016 சட்டசபை தேர்தலில் ஜெயலலிதா எடுத்தார். 234 தொகுதிகளிலும் அதிமுகவின் இரட்டை இலை சின்னத்திலேயே வேட்பாளர்களை நிறுத்தி வென்று காட்டினார். இத்தேர்தலில் தேமுதிக - மதிமுக, மார்க்சிஸ்ட், இந்திய கம்யூனிஸ்ட், வி.சி, - தமாகா ஆகிய கட்சிகள் இணைந்து மக்கள் நலக் கூட்டணி என்ற பெயரில் புதிய கூட்டணியை உருவாக்கின. இக்கூட்டணி தோல்வி அடைந்தது. ஆனாலும், ஆளுங்கட்சிக்கு எதிரான ஓட்டுகள் பிரிந்து ஒரு சதவீத ஓட்டு வித்தியாசத்தில் அதிமுகவே ஆட்சிக்கு வந்தது. மக்கள் நல கூட்டணியை உருவாக்கியதே ஜெயலலிதாதான், அக்கூட்டணி திமுக கூட்டணி ஓட்டுகளை பிரிப்பதால், தான் தனித்து நின்றே வென்று விடலாம் என கணக்கிட்டு ஜெயலலிதா அதை செய்தார் என பேசப்பட்டது. ஜெயலலிதா வழியில் வரும் சட்டசபை தேர்தலில் ஒரு கூட்டணியை உருவாக்கும் முயற்சியில் முதல்வர் ஸ்டாலின் மறைமுகமாக களம் இறங்கியிருப்பதாக கூறப்படுகிறது. தவெக தனித்து போட்டியிடும் பட்சத்தில் அவர்களுடன் சில கட்சிகள் இணையும்போது இயல்பாகவே 2026ன் மக்கள் நலக் கூட்டணியாக அது இருக்கும் என திமுக நினைக்கிறது. அதிமுக கூட்டணி இல்லையென்றால் பாமக, தேமுதிக, புதிய தமிழகம், முன்னாள் முதல்வர் பன்னீர்செல்வம் அணி, தினகரனின் அமமுக மற்றும் சில முஸ்லிம் கட்சிகள் தவெகவுடன் கூட்டணி அமைக்க வாய்ப்புள்ளது என திமுக நம்புகிறது. அதற்கான முயற்சிகளையும் திரைமறைவில் மேற்கொள்ள திமுக திட்டமிட்டுள்ளது. அடுத்தடுத்த மாதங்களில் தமிழக அரசியல் அரங்கில் அதற்கான காட்சிகள் அரங்கேறும் என திமுகவினர் கூறுகின்றனர்.