2014, 2019 லோக்சபா தேர்தல்களில் 40, 50 சீட்களில் மட்டுமே வெற்றி பெற்ற காங்கிரஸ் எதிர்கட்சி அந்தஸ்தை கூட பெறவில்லை. மின்னணு ஓட்டுப்பதிவு எந்திரத்தில் முறைகேடு நடப்பதாக காங்கிரஸ் தலைவர்கள் அப்போது சொன்னார்கள். 2024 லோக்சபா தேர்தலில் 100 இடங்களை காங்கிரஸ் கைப்பற்றியது. ராகுல் எதிர்கட்சி தலைவர் ஆனார். சமீபத்தில் நடந்த அரியானா, மகாராஷ்ட்ரா சட்டசபை தேர்தல்களில் காங்கிரஸ் மண்ணை கவ்வியது. மகாராஷ்ட்ராவில் வரலாறு காணாத வீழ்ச்சியை கண்ட காங்கிரஸ், மின்னணு ஓட்டுப்பதிவு எந்திரங்களில் முறைகேடு நடந்துள்ளதாக குற்றம்சாட்டியது. மீண்டும் ஓட்டுச்சீட்டு முறையை கொண்டு வரக்கோரி பார்லிமென்ட்டில் கூட்டணி கட்சிகளுடன் சேர்ந்து போராட்டமும் நடத்துகிறது. இந்த விவகாரத்தில் காங்கிரசின் நிலைப்பாட்டை கூட்டணி கட்சியான தேசிய மாநாட்டு கட்சி கடுமையாக விமர்சித்துள்ளது.