தவெக கட்சி துவங்கியுள்ள நடிகர் விஜய், மும்மொழி கொள்கைக்கு எதிராக பேசி வருகிறார். இதற்கு பாஜ மூத்த தலைவர் எச்.ராஜா பதிலடி கொடுத்துள்ளார். அவர் வெளியிட்ட பதிவில் கூறியிருப்பதாவது: விஜய் வேட்டைக்காரன் படத்தின் முதல் பாடலில் தனது மகன் ஜேஸன் சஞ்சய் அவர்களோடு நடனமாடி இருப்பார். அந்த பாடலில் பள்ளிச் சிறுவர்கள் கூட்டத்தின் மத்தியில் நின்று, ஆலமர பள்ளிக்கூடம் ஆக்ஸ்போர்டா மாறனும், நீ தாய்மொழியில் கல்வி கற்று தமிழ்நாட்டை உயர்த்தனும, என்று விஜய் பாடுவார். தமிழக மாணவர்கள் தாய்மொழியில் கல்வி கற்று நாட்டை உயர்த்தணும் என்று பாடிய விஜய், மகன் ஜேஸன் சஞ்சயை தமிழ்வழி சமச்சீர் பள்ளியில் சேர்க்காமல், மும்மொழி கல்வி போதிக்கும் சென்னை அமெரிக்கன் இன்டர்நேஷனல் ஸ்கூலில் சேர்த்து படிக்க வைத்திருக்கிறார். ஆலமர பள்ளிக்கூடம் ஆக்ஸ்போர்டா மாறனும் என்ற உயர்ந்த நோக்கத்தோடு தான் புதிய தேசிய கல்விக் கொள்கை உருவாக்கப்பட்டுள்ளது. அதை புரிந்து கொள்ளாமல் அவர் மும்மொழிக் கொள்கையை எதிர்ப்பது ஏன் என தெரியவில்லை. அவர் மகனை மும்மொழி கல்வி போதிக்கும் பள்ளியில் சேர்த்து படிக்க வைத்துவிட்டு அவருடைய ரசிகர்கள் வீட்டுப் பிள்ளைகள் மற்றும் தமிழக குழந்தைகள் அனைவருக்கும் அதே தரத்திலான மும்மொழி கல்வியை மத்திய அரசு வழங்குவதற்கு அவர் எதிர்ப்பு தெரிவிப்பது வியப்பாக இருக்கிறது, என எச்.ராஜா கூறி உள்ளார்.