தமிழகத்தின் நியாயமான கோரிக்கை நிர்மலா சீதாராமன் மீது ஸ்டாலின் வைத்த நம்பிக்கை! தமிழக நிதி அமைச்சர் தங்கம் தென்னரசு, திமுக எம்.பி கனிமொழி இருவரும் இன்று மத்திய நிதி அமைச்சர் நிர்மலா சீதாராமனை டில்லியில் சந்தித்தனர். அப்போது, 2025-26ம் ஆண்டு நிதியாண்டில் நபார்டு வங்கியின் ஊரக உட்கட்டமைப்பு மேம்பாட்டு நிதியின் கீழ் 4,500 கோடி ரூபாய் நிதி, மீன்வள உட்கட்டமைப்பு மேம்பாட்டு நிதியின் கீழ் குளச்சல் மீன்பிடித் துறைமுக விரிவாக்கத்திற்கு 350 கோடி ரூபாய் நிதியையும் விரைந்து வழங்க ஒப்புதல் அளிக்குமாறு முதல்வர் ஸ்டாலின் எழுதிய கடிதத்தை வழங்கினர். தங்கம் தென்னரசுவும், கனிமொழி எம்.பியும் நிர்மலா சீதாராமனிடம் வழங்கிய கடிதம் தொடர்பாக முதல்வர் ஸ்டாலின் பதிவு ஒன்றை வெளியிட்டுள்ளார். குளச்சல் துறைமுக விரிவாக்க பணிகளைத் தொடங்க வேண்டும் என குமரி மாவட்ட மீனவர்கள் என்னை சந்தித்து கோரிக்கையை முன்வைத்துள்ளனர். தமிழகத்தின் இந்த நியாயமான கோரிக்கையை மத்திய நிதி அமைச்சர் நிர்மலா சீதாராமன் ஏற்றுக்கொண்டு, விரைவில் உரிய நிதியை விடுவிப்பார் என நம்புகிறேன் எனவும் ஸ்டாலின் தெரிவித்துள்ளார்.