புதுச்சேரி சாலை போக்குவரத்து கழகமான பிஆர்டிசியில் மொத்தம் 80 பஸ்கள் இயக்கப்படுகிறது. மொத்தமுள்ள 562 பணியிடங்களில் 225 நிரந்தர ஊழியர்களும், 255 ஒப்பந்த ஊழியர்களும் வேலை செய்கின்றனர். 2015 முதல் பணியாற்றும் ஒப்பந்த ஊழியர்கள் பணி நிரந்தரம் செய்ய வலியுறுத்தியும், நிரந்தர ஊழியர்கள் 7வது ஊதியக்குழுவை அமல்படுத்த வலியுறுத்தியும் பல்வேறு போராட்டங்கள் நடத்தி வந்தனர். தொடர் போராட்டம் நடத்தியும் பயன் இல்லாததால் கூட்டு போராட்டக்குழுவினர் திங்களன்று அதிகாலை முதல் தொடர் வேலை நிறுத்த போராட்டத்தில் ஈடுபட்டுள்ளனர். இதனால், புதுச்சேரியில் உள்ள 50 பஸ்களும், காரைக்காலில் உள்ள 23 பஸ்களும் முழுமையாக இயங்கவில்லை. போராட்டம் நடத்தும் ஊழியர்களை எதிர்க்கட்சி தலைவர் சிவா, எம்எல்ஏ சம்பத் சந்தித்து ஆதரவு தெரிவித்தனர். போராட்டம் நடத்தும் ஊழியர்கள் இன்று முதல்வர் ரங்கசாமியை சந்தித்து போச்சுவார்த்தை நடத்தினர். அதில் உடன்பாடு ஏற்படாததால் போராட்டம் தொடரும் என பிஆர்டிசி ஊழியர்கள் அறிவித்துள்ளனர்.