சட்டசபை தேர்தலுக்கு வியூகம் வகுக்கும் அண்ணாமலை! Annamalai | BJP | Tamilnadu | 2026 Election
2026 சட்டசபை தேர்தலுக்கு கட்சியை தயார்படுத்தும் வகையில், பல்வேறு திட்டங்களை செயல்படுத்த, தமிழக பா.ஜ தலைவர் அண்ணாமலை திட்டமிட்டுள்ள தகவல் வெளியாகி இருக்கிறது. இதுகுறித்து, அக்கட்சியின் மாநில நிர்வாகி ஒருவர் கூறியதாவது: மூன்று மாத சர்வதேச அரசியல் படிப்பை முடித்து, லண்டனில் இருந்து தமிழகம் திரும்பி இருக்கிறார் அண்ணாமலை. இதற்கிடையில், ஒரு கோடி பேரை கட்சியில் சேர்க்க இலக்கு நிர்ணயித்து, தமிழக பா.ஜ.வில் உறுப்பினர் சேர்க்கை துவங்கியது. அதில் சில லட்சங்கள் மட்டுமே சேர்க்கப்பட்டுள்ளதால், மேலிடம் அதிருப்தி அடைந்து உள்ளது. சில நாட்களுக்கு முன் டில்லி சென்ற அண்ணாமலை, கட்சியின் மூத்த தலைவர்கள் சிலரை சந்தித்துள்ளார். அப்போது, தன் திட்டம் குறித்து அவர் சொல்ல, அதை விரைந்து செயல்படுத்துமாறு, கட்சி தலைமை அவருக்கு உத்தரவிட்டுள்ளது. அண்ணாமலை தவிர, மற்ற தலைவர்களுக்கு கட்சி செயல்பாடுகளில் முக்கியத்துவம் இல்லை என்ற வருத்தம், தமிழிசை, பொன்.ராதாகிருஷ்ணன், எச்.ராஜா, வானதி, நயினார் நாகேந்திரன், கருப்பு முருகானந்தம், சீனிவாசன், எஸ்.ஆர்.சேகர், அஸ்வத்தாமன் உள்ளிட்டோருக்கு உள்ளது. இதை அண்ணாமலையும் உணர்ந்துள்ளார். அதனாலேயே, அவர்களுக்கு பொறுப்புகளை பகிர்ந்தளிப்பது என முடிவெடுத்துள்ளார். மொத்தம் உள்ள 234 சட்டசபை தொகுதிகளையும், 30 பாகங்களாக பிரித்து, ஒவ்வொரு பாகத்துக்கும் பொறுப்பாளர்களாக, மூத்த தலைவர்களை நியமிக்கப் போகிறார். இன்னும் ஓராண்டு காலத்துக்கு, அந்த 30 பாகங்களுக்கும் அவர்களே தலைவர்கள் போல செயல்படுவர். அந்த 30 பாகங்களில் உள்ள மாவட்டத் தலைவர்கள் அனைவரையும் தனக்கு கீழே கொண்டு வந்து, ஒவ்வொரு தொகுதியிலும் வேகமாக கட்சியை வளர்த்தெடுக்க வேண்டும். ஒவ்வொரு தொகுதிக்குமான வேட்பாளர்களை, மூன்று மாதத்துக்குள் கண்டறிந்து, அதை தலைமைக்கு தெரியப்படுத்த வேண்டும். இப்படி பரிந்துரை செய்யப்படும் நபர்களில் இருந்து, ஒரு சிலரை தேர்வு செய்யும் தலைமை, அவர்களையும் தொகுதிக்குள் களம் இறக்கி, முன்கூட்டியே தேர்தல் வேலை பார்க்க துாண்டும். இப்படி பகிர்ந்தளிக்கப்படும் தொகுதிகளில் கடுமையாக பணியாற்றி, எந்த தலைவர் அதிக தொகுதிகளை வென்று கொடுக்கின்றனரோ, அவருக்கு கட்சியில் அடுத்தடுத்த வாய்ப்புகளை வழங்கவும் முடிவெடுத்துள்ளனர். இப்படி செய்வதன் வாயிலாக, நாங்களெல்லாம் அண்ணாமலைக்கு சமமான தலைவர்; ஆனால், எங்களுக்கு கட்சியில் எந்த முக்கியத்துவமும் கொடுக்கப்படுவதில்லை என்று புலம்பும் தலைவர்கள், தேர்தல் வெற்றிக்காக ஓடியாடி உழைத்தாக வேண்டும்.