திமுக கூட்டணியில் முக்கிய கட்சியாக விசிக உள்ளது. அக்கட்சியை தங்கள் கூட்டணிக்கு கொண்டு வர பா.ஜ - அ.தி.மு.க, த.வெ.க உள்ளிட்ட கட்சிகள் முயற்சிக்கின்றன. ஆனால், பா.ஜ., - பா.ம.க., இடம் பெறும் கூட்டணியில் வி.சிக இடம் பெறாது என திருமாவளவன் தெரிவித்துள்ளார். அதேநேரம், தி.மு.க., கூட்டணியில், கடந்த சட்டசபை தேர்தலில் ஆறு இடங்களில் போட்டியிட்ட வி.சிக வரும் 2026 சட்டசபை தேர்தலில் 10க்கும் மேற்பட்ட தொகுதிகளில் போட்டியிட விரும்புகிறது. குறிப்பாக, ஐந்துக்கும் அதிகமான பொது தொகுதிகளில் போட்டியிட வேண்டும் என அக்கட்சியினர் கேட்கின்றனர். இந்நிலையில் சட்டசபை தேர்தலில் கூட்டணியில் அதிக சீட் கிடைக்காவிட்டாலும், தி.மு.க., கூட்டணியில் தொடரப் போவதாக, கட்சி நிர்வாகிகளிடம் திருமாவளவன் தெரிவித்ததாக கூறப்படுகிறது. இது குறித்து கருத்து தெரிவித்த விசிக நிர்வாகிகள், தற்போதைய சூழலில் திமுக கூட்டணியில் இரட்டை இலக்க இடங்களை கேட்டு வருகிறோம். எங்கள் கட்சியும் பரவலாக வளர்ச்சி அடைந்திருப்பதால், கேட்கும் இடங்கள் கிடைக்கும் என்று நம்புகிறோம். அதே நேரம், விரும்பிய எண்ணிக்கையில் இடங்கள் கிடைக்காவிட்டாலும், மதவாத சக்திகளை எதிர்க்கும் எங்கள் முடிவில் மாற்றம் இருக்காது. இதே நிலைப்பாட்டில் தான் திருமாவளவனும் உள்ளார். இது தான் என் முடிவு என்றும் கட்சி நிர்வாகிகளிடம் திருமாவளவன் தெரிவித்துள்ளார். அதனால், என்ன நடந்தாலும், தி.மு.க., கூட்டணியில் தான் வி.சிக நீடிக்கும் இதில் மாற்றம் இருக்காது என்றனர்.