தவெக உறுப்பினர் சேர்க்கை விளம்பரத்தில் அக்கட்சி பொதுச்செயலாளர் ஆனந்த் படத்தை பயன்படுத்த தடை போட்டு விஜய் அதிரடி உத்தரவு பிறப்பித்து உள்ளார். இது கட்சி வட்டாரத்தில் பரபரப்பை ஏற்படுத்தி உள்ளது. இது தொடர்பாக தவெக மேல்மட்ட நிர்வாகிகள் கூறியது: கட்சியில் தலைவர் விஜய்க்கு அடுத்த அதிகார மையமாக பொதுச் செயலாளர் ஆனந்த் உள்ளார். நிர்வாகிகள் நியமனம் முதல், முக்கிய முடிவுகள் எடுப்பது வரை, ஆனந்த் முன்னின்று செய்கிறார். தவெகவில் நியமிக்கப்பட்ட 120 மாவட்டச் செயலர்களில் 60க்கும் மேற்பட்டோர் அவரது தீவிர ஆதரவாளர்கள். அவர்களுக்கு பெரிய அளவில் ஆனந்த் முக்கியத்துவம் கொடுப்பதோடு, அவர்களை வைத்து, கட்சி பணிகளில் தீவிரமாக இருப்பது போல் காட்டிக் கொள்கிறார். இதற்கென தவெகவில் வாட்ஸாப் குழு துவக்கப்பட்டு உள்ளது. அதில் ரகசிய உறுப்பினராக விஜயும் உள்ளார். அந்த குழுவில் கட்சியின் அன்றைய நிகழ்வுகளை மாநில நிர்வாகிகள், மாவட்டச் செயலாளர்கள் பதிவு செய்கின்றனர். தனக்கென தனியாக ஐடி அணி நடத்தும் ஆனந்த், அவர்கள் மூலம் படங்களை பெற்று குழுவில் பதிவேற்றி, விஜய் கவனத்தை ஈர்த்து வருகிறார். அதே நேரத்தில், விஜய்க்கு இணையாக தன்னையும் விளம்பரப்படுத்தி வருகிறார். தவெகவில் 2 கோடி உறுப்பினர்களை சேர்க்க திட்டமிட்டு, ஒவ்வொரு வீட்டிலும் மக்கள் விரும்பும் முதல்வர் வேட்பாளர் என்ற வாசகம் இடம் பெற்ற ஸ்டிக்கரை கட்சியினர் ஒட்டி வருகின்றனர். அதில், விஜய் படத்துடன் ஆனந்த் படமும் இருப்பதால், யார் முதல்வர் வேட்பாளர் என்ற குழப்பம் ஏற்பட்டுள்ளது. தமிழகம் மட்டுமின்றி புதுச்சேரியிலும் இதே குழப்பம். ஏற்கனவே புதுச்சேரி முதல்வர் ஆகும் கனவில் ஆனந்த் இருப்பதாக கூறப்படுகிறது. அவர் விஜய்க்கு இணையாக, தன்னையும் முன்னிலைப்படுத்தி வருவதை கட்சி நிர்வாகிகள் சிலர், விஜய் கவனத்துக்கு கொண்டு சென்றனர். இதனால் உஷார் ஆன விஜய், உறுப்பினர் சேர்க்கை விளம்பர ஸ்டிக்கரில், ஆனந்த் படத்தை பயன்படுத்த வேண்டாம். இனிமேல், கட்சி தலைமை ஏற்பாடு செய்யும் நிகழ்ச்சிகளுக்கான விளம்பரங்களுக்கு, என் அனுமதியை பெற வேண்டும். கட்சி தொடர்பான விளம்பரங்களிலும், இனி ஆனந்த் படம் போடத் தேவையில்லை என்று அதிரடியாக உத்தரவு பிறப்பித்துள்ளார். இதையடுத்து ஆனந்த் படத்துடன் கூடிய ஸ்டிக்கர் மீது விஜய் மட்டும் இருக்கும் புதிய ஸ்டிக்கரை கட்சியினர் ஒட்டி வருகின்றனர். ஆனால், ஆனந்த் ஆதரவாளர்கள், அவரது புகைப்படம் இடம்பெற்ற ஸ்டிக்கரை அகற்றாமல் அப்படியே வைத்திருப்பது கட்சிக்குள் சலசலப்பை ஏற்படுத்தியுள்ளது என்று அந்த நிர்வாகிகள் கூறினர்