உத்தராகண்டில் உள்ள கங்கோத்ரி, யமுனோத்ரி, கேதார்நாத், பத்ரிநாத் ஆகிய 4 கோயில்கள் மிகவும் பிரசித்தி பெற்றவை. குளிர் காலத்தில் இந்த கோயில்கள் மூடப்பட்டிருக்கும். கோடை காலத்தில் மட்டுமே 4 கோயில்களும் திறக்கப்படும். இந்த கோயில்களுக்கு பக்தர்கள் செல்லும் யாத்திரை சார்தாம் யாத்திரை என அழைக்கப்படுகிறது. சார்தாம் யாத்திரையையொட்டி, கங்கோத்ரி, யமுனோத்ரி ஆகிய கோயில்கள் சமீபத்தில் திறக்கப்பட்ட நிலையில், புகழ்பெற்ற கேதார்நாத் கோயில் நடை இன்று காலை 7:00 மணிக்கு திறக்கப்பட்டது. இந்த விழாவில் உத்தராகண்ட் முதல்வர் புஷ்கர் சிங் தாமி பங்கேற்றார். இந்த ஆண்டு முதல் புது ஏற்பாடாக உத்தரபிரதேசத்தின் காசி கோயிலில் மேற்கொள்ளப்படும் கங்கா ஆரத்தி போல, இங்கும் ஆரத்தி மேற்கொள்ளப்பட உள்ளது. இதற்காக, மந்தாகினி மற்றும் சரஸ்வதி நதிகள் இணையும் பகுதியில் ஆரத்திக்கு ஏற்பாடு செய்யப்பட்டுள்ளது. கோயிலின் உட்புறம் மற்றும் வெளிப்புறங்கள் அழகிய மலர்களால் அலங்கரிக்கப்பட்டு உள்ளன. அந்த மலர்களில் பெரும்பாலானவை, நம் நாட்டின் கொல்கத்தா மற்றும் வெளிநாடுகளான தாய்லாந்து, இலங்கை, நேபாளத்தில் இருந்து கோயிலுக்கு எடுத்து வரப்பட்டன.