உலகப் பயணத்தை ஆரம்பித்த 'இந்தியன் 2' குழுவினர்

ஷங்கர் இயக்கத்தில், அனிருத் இசையமைப்பில், கமல்ஹாசன், சித்தார்த், எஸ்ஜே சூர்யா, காஜல் அகர்வால், ரகுல் ப்ரீத் சிங் மற்றும் பலர் நடிக்கும் படம் 'இந்தியன் 2'. அடுத்த மாதம் 12ம் தேதி வெளியாக உள்ள இப்படத்தின் புரமோஷனை சில தினங்களுக்கு முன்பே ஆரம்பித்துவிட்டனர்.

சென்னை, மும்பை ஆகிய இடங்களில் படக்குழுவினர் பத்திரிகையாளர்களை சந்தித்தனர். அடுத்து இன்று மாலை மலேசியாவில் பத்திரிகையாளர்களை சந்திக்க உள்ளனர். அதற்கடுத்து ரசிகர்களின் சந்திப்பும் நடைபெற உள்ளது. இதற்காக கமல்ஹாசன், சித்தார்த், எஸ்ஜே சூர்யா உள்ளிட்ட படக்குழுவினர் மலேசியா சென்றுள்ளனர்.

மலேசியாவில் இப்படம் சுமார் 156 இடங்களில் திரையிடப்பட உள்ளது. மலேசியாவில் இதற்கு முன்பு வேறு எந்தப் படமும் இத்தனை இடங்களில் வெளியாகவில்லை. மலேசியாவைத் தொடர்ந்து சிங்கப்பூரிலும் பத்திரிகையாளர் சந்திப்பு நடைபெற உள்ளது. மேலும் சில வெளிநாடுகளிலும் இப்படத்திற்கான நிகழ்வுகள் நடைபெறும் எனத் தெரிகிறது.