மதுரையை காட்டுகிறேன் வாருங்கள் : மலையாள நடிகை அன்னா பென் அழைப்பு

மலையாள சினிமாவின் முன்னணி நடிகை அன்னா பென். 'கொட்டுக்காளி' என்ற படத்தின் மூலம் தமிழ் சினிமாவில் அறிமுகம் ஆகிறார். இந்தப் படத்தில் சூரி கதையின் நாயகன். நாயகி அன்னா பென். கூழாங்கல் படத்தை இயக்கிய வினோத் ராஜ் இயக்கி உள்ளார். சிவகார்த்திகேயன் தயாரித்துள்ளார்.

பல சர்வதேச திரைப்பட விழாக்களில் விருதுகளை குவித்த இந்த படம் வருகிற 23ம் தேதி தியேட்டர்களில் வெளியாகிறது. இந்த நிலையில் படத்தில் நடித்திருப்பது குறித்து அன்னா பென் தனது இன்ஸ்டாகிராம் பக்கத்தில் எழுதியிருப்பதாவது:

‛‛மீனா ( படத்தில் கேரக்டர் பெயர்) என்னுள் ஒரு அங்கம் என்பது நான் அறிந்ததே இல்லை, பல அற்புதமான விஷயங்களில் கொட்டுக்காளி ஒரு வெளிப்பாடு. இந்த கொட்டுக்காளி எவ்வளவு அன்பானவளாக இருக்கிறாளோ, அதேபோல் வலிமையும், நெகிழ்ச்சியும் உடையவளாக இருப்பாள். அவள் மூலமாக மதுரை வழியாக இந்த பயணத்தில் உங்கள் அனைவரையும் அழைத்துச் செல்ல காத்திருக்கிறேன்'' என்று பதிவிட்டுள்ளார்.