69வது படத்தில் போலீஸ் அதிகாரியாக நடிக்கும் விஜய்!

எச்.வினோத் இயக்கத்தில் விஜய் நடித்து வரும் 69வது படத்தின் படப்பிடிப்பு தற்போது கேரளாவில் நடைபெற்று வரும் நிலையில், இந்த படத்தில் விஜய் நடித்து வரும் கதாபாத்திரம் குறித்த ஒரு தகவல் தற்போது கசிந்து இருக்கிறது. அதாவது, இந்த படத்தில் போலீஸ் அதிகாரியாக விஜய் நடிப்பதாக தெரியவந்துள்ளது. சமூகத்தில் நடந்து வரும் ஒரு முக்கிய பிரச்னைக்கு முடிவு கட்டும் வகையில் விஜய்யின் கதாபாத்திரம் இப்படத்தில் அமைந்திருப்பதாக கூறுகிறார்கள்.

ஏற்கனவே கார்த்தி நடிப்பில் எச்.வினோத், 'தீரன் அதிகாரம் ஒன்று' படத்தை காவல்துறை சம்பந்தப்பட்ட கதையில் இயக்கிய நிலையில், தற்போது இந்த படமும் காவல்துறை சம்பந்தப்பட்ட இன்னொரு கதைக்களத்தில் உருவாகி வருகிறது. அதேசமயம் இந்த படத்தில் காவல்துறை அதிகாரியான விஜய், அரசியல்வாதிகளுடன் மோதுகிறாரா? இல்லை வேறு சமூக பிரச்னையை வேரறுக்கிறாரா? என்பது சஸ்பென்ஸ் ஆக உள்ளது. மேலும் அதிரடியான ஆக்சன் கதையில் உருவாகி வரும் இந்த படத்தில் அவருக்கு ஜோடியாக பூஜா ஹெக்டே நடிக்கும் நிலையில், பாபி தியோல், பிரகாஷ்ராஜ், கவுதம் மேனன், மமிதா பைஜு, பிரியாமணி ஆகியோரும் முக்கிய வேடங்களில் நடிக்கிறார்கள். அனிருத் இசையமைக்கிறார்.