என் அம்மா கமலா காமேஷ் நலமாக உள்ளார், இறந்தது என் மாமியார் - உமா ரியாஸ் விளக்கம்

அலைகள் ஓய்வதில்லை, கடலோரக் கவிதைகள், சம்சாரம் அது மின்சாரம் உள்ளிட்ட நூற்றுக்கணக்கான படங்களில் நடித்தவர் கமலா காமேஷ், 72. இன்று(ஜன., 11) காலை முதலே இவர் உடல்நலக் குறைவால் இறந்துவிட்டதாக செய்தி பரவியது. ஆனால் அது உண்மையல்ல.

இதுபற்றி கமலா காமேஷின் மகளும், நடிகையுமான உமா ரியாஸை அலைப்பேசியில் தொடர்பு கொண்டு கேட்டபோது, அவர் கூறுகையில், ‛‛என் அம்மா பற்றி வெளியான செய்தி தவறானது. என் அம்மா கமலா காமேஷ் நலமாக உள்ளார். இறந்தது என் மாமியார் ரஷீதா பானு, 72. வயதுமூப்பு மற்றும் உடல்நல பிரச்னையால் சென்னையில் இறந்துவிட்டார்'' என்றார்.

உமா ரியாஸ், நடிகர் ரியாஸ் கானை காதலித்து திருமணம் செய்தார். ரியாஸின் அம்மா ரஷீதா தான் இறந்துவிட்டார். ஆனால் உமா ரியாஸின் அம்மா கமலா இறந்துவிட்டது போன்று தவறாக செய்தி பரவிவிட்டது.