'இட்லி கடை' - இன்னும் தயாராகவில்லையா?

தனுஷ் இயக்கி நாயகனாக நடிக்க உடன் நித்யா மேனன், அருண் விஜய் மற்றும் பலர் நடிக்க உருவாகி வரும் படம் 'இட்லி கடை'. ஏப்ரல் 10ம் தேதி இப்படம் வெளியாகும் என்று அறிவித்துவிட்டார்கள்.

ஆனால், படம் பற்றிய அப்டேட் எதுவும் சமீப காலமாக வெளியாகவில்லை. அதே தினத்தில் வெளியாக உள்ள அஜித்தின் 'குட் பேட் அக்லி' படத்தின் புரமோஷனை பரபரப்பாக ஆரம்பித்துள்ளார்கள். சிங்கிள் ரிலீஸ் என்றெல்லாம் ரசிகர்களை ஈர்த்து வருகிறார்கள்.

ஆனால், இன்னும் இருபது நாட்கள் மட்டுமே உள்ள நிலையில் 'இட்லி கடை' பற்றி எதுவும் வராமல் இருப்பது தனுஷ் ரசிகர்களை சந்தேகத்தில் தள்ளியுள்ளது. திட்டமிட்டபடி ஏப்ரல் 10ம் தேதி படம் வெளியாகாமல் தள்ளிப் போகுமா என்பதும் தெரியவில்லை. இப்படத்திற்கும் ஜிவி பிரகாஷ்தான் இசையமைக்கிறார்.

ஆனால், 'குட் பேட் அக்லி' பற்றி தானாகவே அப்டேட் கொடுத்த ஜிவி, 'இட்லி கடை' பற்றி மட்டும் தானாக எதுவும் சொல்லாமல் இருக்கிறாரே என்றும் கேள்வி எழுந்துள்ளது.