‛திரிஷ்யம் 3' படத்தின் படப்பிடிப்பு எப்போது? புதிய தகவல் இதோ!
ADDED : 48 days ago
கடந்த 2013ம் ஆண்டில் மலையாளத்தில் ஜீத்து ஜோசப் இயக்கத்தில் மோகன்லால், மீனா நடித்து வெளிவந்த படம் 'திரிஷ்யம்'. இந்த படத்தின் மாபெரும் வெற்றியால் இப்படத்தை தமிழ், தெலுங்கு, ஹிந்தி ஆகிய மொழிகளில் ரீமேக் செய்தனர். தமிழில் கமல்ஹாசன் 'பாபநாசம்' எனும் பெயரில் ரீமேக் செய்தார் என்பது குறிப்பிடத்தக்கது.
அதன்பிறகு கடந்த 2021ம் ஆண்டில் ஜீத்து ஜோசப், மோகன்லால் கூட்டணியில் 'திரிஷ்யம் 2' கொரோனா காலகட்டத்தினால் நேரடியாக ஓடிடி தளத்தில் வெளியாகி நல்ல வரவேற்பு பெற்றது. ஹிந்தி, தெலுங்கிலும் ரீ-மேக் ஆனது.
கடந்த சில மாதங்களுக்கு முன்பு திரிஷ்யம் 3ம் பாகம் உருவாகும் என ஏற்கனவே அறிவித்திருந்தனர். இந்த படத்தின் மீது ரசிகர்களுக்கு பெரும் எதிர்பார்ப்பு உள்ளது. இந்த நிலையில் திரிஷ்யம் 3 படத்தின் படப்பிடிப்பை வருகின்ற செப்டம்பர் 18ம் தேதி அன்று தொடங்கவுள்ளதாக மலையாள சினிமா வட்டாரத்தில் தெரிவிக்கின்றனர்.