குஷி பார்ட் 2 உருவாகுமா? விஜய் மகன், ஜோதிகா மகள் நடிப்பார்களா?
ADDED : 50 days ago
ஏ.எம்.ரத்னம் தயாரிப்பில் எஸ்.ஜே.சூர்யா இயக்கத்தில், விஜய், ஜோதிகா நடித்த ‛குஷி' படம், 25 ஆண்டுகளுக்குபின் செப்டம்பர் 25ல் ரீ ரிலீஸ் ஆகிறது. அது குறித்து எஸ்.ஜே.சூர்யா பேசுகையில், ‛‛குஷி படத்தை எடுத்தவிதமே வித்தியாசமானது. கோல்கட்டாவில் பிறந்த ஹீரோவும், குற்றாலம் அருகே பிறந்த ஹீரோயினும் எப்படி சேருகிறார்கள் என்ற விஷயத்தை படத்தின் தொடக்கத்திலேயே சொன்னேன். அது பலருக்கும் ஆச்சரியமாக இருந்தது. ஆனால், திரைக்கதை வெற்றிபெற்றது.
குஷி படத்தின் வெற்றிக்கு இசையமைப்பாளர் தேவா இசையும் முக்கிய காரணம், கட்டிப்பிடி கட்டிபிடி பாடலின் டியூனை செந்தமிழ் தேன்மொழியாய் என்ற பழைய பாடலில் இருந்து எடுத்தோம். அந்த பாடலை வேகமாக பாடினால் இந்த பாடல் டியூன் வரும். படத்தின் அனைத்து பாடல்களும் சூப்பர் ஹிட் ஆனது. 25 ஆண்டுகளுக்குபின் நான் ரசிகனாக இப்போது படத்தை பார்த்து என்ஜாய் பண்ணுகிறேன். விஜய் டான்சும் பாடலை பிரபலமாக்கியது. படத்தில் ஜோதிகாவுக்கு இளையநிலா என்ற பட்டம் கொடுத்தேன். புதிதாக அறிமுகம் ஆகிற அவருக்கு அது செட்டானது. அந்த படத்தின் வெற்றிக்காக உதவி செய்த ஒளிப்பதிவாளர் ஜீவாவுக்கு நன்றி.
நான் நடிக்க வந்தேன். ஆனால், இயக்குனர் ஆகிவிட்டேன். இப்போது தமிழ், தெலுங்கில் பிஸியாக நடித்து வருகிறேன். இப்போது கில்லர் என்ற படத்தை இயக்கி வருகிறேன். அந்த படத்துக்கு கால்ஷீட் கொடுக்க முடியாத அளவுக்கு பிஸியாக இருக்கிறேன். குஷி படம் தெலுங்கிலும் பவன்கல்யாண், பூமிகா நடிக்க ரீமேக் ஆனது. இன்றும் அந்த படத்தால் எனக்கு தெலுங்கில் நல்ல பெயர். இந்தியிலும் உருவானது.
குஷி படத்தில் அந்த இடுப்பு காட்சி பற்றி எப்படி எடுத்தீர்கள் என பலரும் கேட்கிறார்கள். அந்த காலத்தில் காதல் படங்களில் அரசியல், ஜாதி, மதம், ஏற்றத்தாழ்வு, குடும்ப பகை ஆகியவை வில்லத்தனமாக சித்தரிக்கப்பட்டன. நாம் புதுசா சிந்திப்போம்னு நினைத்தேன். காதலுக்கு காதலர்களே, அவர்களின் ஈகோவே எதிரி என்று கதை உருவாக்கினேன். அப்போது அந்த இடுப்பு சீன் வந்தது. நான் ஏன் பார்க்க கூடாது. நீ என் கேர்ள் பிரண்ட் என்று ஹீரோ கேட்டு, ஹீரோயின் அதை ஓகே சொல்லிவிட்டால் படம் முடிந்துவிடும். ஆனால், அந்த இடுப்பு ஈகோ பிரச்னையை திரைக்கதையில் பெரிதாக்கினேன். படமும் பேசப்பட்டது. எரிக் சீகல் என்ற எழுத்தாளர் ரைட்டிங் எனக்கு பிடிக்கும். அந்த பாணியில்தான் அந்த சீனை எடுத்தோம். நான் நடிப்பில் பிஸியாக இருக்கிறேன், திருமணம் குறித்து யோசிக்கவில்லை. நான் சுதந்திர பறவையாக இருக்கிறேன்.
‛குஷி 2'வை எடுக்க வேண்டும் என்கிறார் தயாரிப்பாளர் ஏ.எம்.ரத்னம். இப்போது விஜய் நடிப்பில் இருந்து விலகுகிறார். ஆனால், அவர் மகன் சஞ்சய் அழகாக இருக்கிறார். ஜோதிகா மகளும் வளர்ந்துவிட்டார். அவர்கள் இருவரையும் வைத்து குஷி 2 உருவாகுமா என தெரியவில்லை. சில அதிசயங்களை உருவாக்க முடியாது. அதுவாக நடக்க வேண்டும். இறைவன் அமைத்து கொடுத்தால் எல்லாம் நடக்கும். அடுத்த காதலர் தினத்துக்கு எனது ‛நியூ' படத்தை ரீ ரிலீஸ் செய்யப்போகிறேன் என்றார்.