தொடரும் பட இயக்குனரின் சினிமாட்டிக் யுனிவர்ஸில் ஹீரோவாக நடிக்கும் பிரித்விராஜ்

கடந்த சில மாதங்களுக்கு முன்பு மலையாளத்தில் மோகன்லால் நடிப்பில் வெளியாகி மிகப்பெரிய வெற்றியை பெற்ற படம் தொடரும். கிட்டத்தட்ட 200 கோடிக்கு மேல் வசூலித்த இந்த படத்தை இயக்குனர் தருண் மூர்த்தி இயக்கியிருந்தார். இதற்கு முன்னதாக அவர் சவுதி வெள்ளக்கா மற்றும் ஆபரேஷன் ஜாவா என இரண்டு சிறிய படங்களை இயக்கியிருந்தார். தொடரும் பட வெற்றியை தொடர்ந்து அவர் நடிகர் கார்த்தி அல்லது சூர்யாவை வைத்து இயக்கப் போவதாகவும் ஒரு தகவல் வெளியானது. ஆனால் கடந்த மாதம் அவர் தன்னுடைய படம் ஒன்றின் இரண்டாம் பாகத்திற்காக கதையை எழுதி வருகிறேன் என்று கூறியவர், அது எந்த படத்திற்கான இரண்டாம் பாகம் என சொல்லாமல் சஸ்பென்ஸ் வைத்தார்.

இந்த நிலையில் அவர் அடுத்த இயக்க இருக்கும் படத்திற்கு ஆபரேஷன் கம்போடியா என்று டைட்டில் வைக்கப்பட்டுள்ளது. இந்த படத்தில் பிரித்விராஜ் கதாநாயகனாக நடிக்கிறார். ஆச்சரியமாக அவர் குறிப்பிட்டது கடந்த 2021ல் அவர் இயக்கிய ஆபரேஷன் ஜாவா படத்தின் சினிமாட்டிக் யுனிவர்ஸ் ஆக தான் இந்த படத்தை இயக்குகிறார் என்பது தற்போது வெட்ட வெளிச்சமாகியுள்ளது. முதல் பாகத்தில் நடித்த முக்கிய நடிகர்கள் சிலரும் இந்த இரண்டாம் பாகத்தில் நடிக்க இருக்கின்றனராம்.