லோகா ஒளிப்பதிவாளருக்கு விலை உயர்ந்த வாட்ச் பரிசளித்த கல்யாணி பிரியதர்ஷன்

மலையாளத்தில் பிரபல இயக்குனர் பிரியதர்ஷன் மற்றும் நடிகை லிசி தம்பதியின் மகள் கல்யாணி பிரியதர்ஷன். சில வருடங்களுக்கு முன்பு நடிகையாக அறிமுகமானவர் இன்று மலையாளத் திரையுலகில் நம்பர் ஒன் வசூல் பட கதாநாயகி என்கிற சாதனைக்கு சொந்தக்காரராக மாறியுள்ளார். லோகா சாப்டர் 1 ; சந்திரா என்கிற வெற்றி படத்தின் கதாநாயகியாக கொண்டாடப்பட்டு வருகிறார். இந்திய அளவில் முதல் சூப்பர் உமன் கதை அம்சம் கொண்ட படமாக கடந்த ஆகஸ்ட் இறுதியில் மலையாளத்தில் வெளியான லோகா திரைப்படம் 250 கோடிக்கு மேல் வசூலித்துள்ளது.

இதன் அடுத்தடுத்த பாகங்களும் உருவாக இருக்கின்றன. இதன் இரண்டாம் பாகம் சமீபத்தில் அறிவிக்கப்பட்டது. இந்த படத்தின் வெற்றியில் கல்யாணி பிரியதர்ஷன் இந்த அளவுக்கு பேசப்படுவதற்கு ஒளிப்பதிவாளர் நிமிஷ் ரவியின் அற்புதமான கேமரா கோணங்களும் முக்கிய காரணம் என பல பத்திரிகைகள் பாராட்டின. அதை உறுதிப்படுத்துவது போல படத்தின் நாயகி கல்யாணி பிரியதர்ஷன் ஒளிப்பதிவாளர் நிமிஷ் ரவிக்கு ஒரு விலை உயர்ந்த வாட்ச் ஒன்றை லோகா படத்தின் வெற்றிக்காக பரிசளித்துள்ளார்.