சீனியர் நடிகர் மதுவை நேரில் சென்று சந்தித்த மம்முட்டி

நடிகர் மம்முட்டி தனது உடல்நல குறைவு மற்றும் சிகிச்சை காரணமாக கடந்த ஏழு மாதங்களுக்கு மேல் சென்னையில் உள்ள தனது வீட்டில் தங்கி ஓய்வெடுத்து வந்தார். சமீபத்தில் தான், தான் நடித்துவரும் ‛பேட்ரியாட்' படத்தின் விசாகப்பட்டினம் மற்றும் லண்டன் படப்பிடிப்புகளில் கலந்து கொண்டு 8 மாதத்திற்கு பிறகு கேரளா திரும்பினார். நேற்று கேரள மாநில முதல்வருடன் ஒரு அரசு நிகழ்ச்சியில் கலந்து கொண்ட மம்முட்டி அப்படியே திருவனந்தபுரத்தில் உள்ள மூத்த நடிகரான மதுவின் வீட்டிற்கு சென்று அவரை சந்தித்து ஆசி பெற்றுள்ளார்.

70, 80களில் மலையாள திரையுலகில் சூப்பர் ஸ்டார் அந்தஸ்தில் வலம் வந்தவர் நடிகர் மது. தமிழில் ‛தர்மதுரை' படத்தில் ரஜினிகாந்தின் தந்தையாக நடித்தவர் இவர்தான். இப்போது சினிமாவில் இருந்து ஓய்வு பெற்று திருவனந்தபுரத்தில் தனது வீட்டில் வசித்து வரும் மதுவை சந்தித்துள்ள மம்முட்டி, “நீண்ட நாட்களுக்குப் பிறகு என்னுடைய சூப்பர் ஸ்டாரை சந்தித்தபோது எடுத்த படம்” என்று ஒரு புகைப்படத்தையும் தனது சோசியல் மீடியா பக்கத்தில் பகிர்ந்து கொண்டுள்ளார்.