'பீட்சா' படத்தில் நடித்தேன்: கவின் சொன்ன பிளாஷ்பேக்

பொதுவாக பெரிய ஹீரோவானவர்கள் தங்களின் பழைய படங்கள், சின்ன படங்கள் பற்றி அதிகம் பேச மாட்டார்கள். ஆனால் கவின் தான் நடிக்கும் 'மாஸ்க்' பட விழாவில் அது குறித்து பேசியுள்ளார்.

அவர் பேசுகையில், ''என் லைப்பில் நான் நம்பும் விஷயம் ஒன்றுதான். இன்றைய நாள் நல்லபடியாக போக வேண்டும் என்பது தான், அது. அதில் செய்ய வேண்டியதையெல்லாம் சரியாக செய்து முடித்தால், எல்லாம் நன்றாக நடக்கும் என நம்புகிறேன். விஜய் சேதுபதி அண்ணாவுக்கு நன்றி. அவரின் 'பீட்சா' படத்தில் தான் நான் சின்ன வேடத்தில் அறிமுகமானேன். நாம் விரும்புவதை விருப்பத்துடன் செய்தால் அது நடக்கும், ஜெயிப்போம் என நிரூபித்தவர் விஜய்சேதுபதி. அவர் என்னை வாழ்த்தியதற்கு நன்றி.

ஆண்ட்ரியா மேடம் தான் முதலில் மாஸ்க் கதையை கேட்டார். அவர் நடிப்பு மிகச்சிறப்பாகப் பேசப்படும். இசையமைப்பாளர் ஜி.வி.பிரகாஷ் நடிப்பது, பாடுவது, இசையமைப்பது, கச்சேரி என இத்தனை வேலைகளை எப்படிச் செய்கிறார் என ஆச்சரியமாக இருக்கிறது. அவர் தூங்குகிறாரா என சந்தேகம் ஏற்படுகிறது. அவர் உடலை நன்றாக பார்த்துக்கொள்ள வேண்டும்'' என்றார்.

கவின் நடித்த 'ஸ்டார், கிஸ்' படங்கள் பெரிய ஹிட் ஆகாததால் இந்த படத்தை அவர் பெரிதும் நம்பி இருக்கிறார். அதனால் படம் குறித்து நன்றாக புரமோஷன் செய்கிறார் என்றும் தகவல்.