முதல் பாகத்தை விட அதிக பட்ஜெட்டில் தயாராகும் 'மரகத நாணயம் 2'

2017ம் ஆண்டு வெளியான கற்பனை நகைச்சுவை திரைப்படமான 'மரகத நாணயம்' நல்ல வரவேற்பு பெற்றது. தற்போது இதன் தொடர்ச்சியாக 'மரகத நாணயம் 2' உருவாகி வருகிறது.

இந்தப் படத்தில் ஆதியும், பிரியா பவானி சங்கரும் முதன்மை கதாபாத்திரங்களில் நடித்துள்ளனர். இவர்களுடன் சத்யராஜ், நிக்கி கல்ராணி பினிசெட்டி, முனீஷ்காந்த், ஆனந்தராஜ், டேனி, அருண்ராஜா காமராஜ் மற்றும் முருகானந்தம் ஆகியோர் நடித்துள்ளனர். ஏ.ஆர்கே.சரவண், இயக்கி உள்ளார். திபு நினன் தாமஸ் இசை அமைத்துள்ளார். பி.வி. சங்கர், ஒளிப்பதிவு செய்துள்ளார்.

படம் குறித்து பேஷன் ஸ்டுடியோஸ் தயாரிப்பாளர் சுதன் சுந்தரம் கூறும்போது'மரகத நாணயம் 2' தயாரிப்பதில் நான் மிகுந்த மகிழ்ச்சி அடைகிறேன். முதல் பாகத்தின் தீவிர ரசிகன் என்பதால் இந்தப் படம் என் மனதிற்கு நெருக்கமானது. இந்தமுறை உலகளவில் உள்ள பார்வையாளர்களை கவரும் வகையில் படம் பெரிய பட்ஜெட்டில் உருவாக்கப்பட்டுள்ளது. முதல் பாகத்தைப் போலவே, ஆதியும் பிரியா பவானி சங்கரும் முதன்மை கதாபாத்திரங்களில் நடித்துள்ளனர். இன்னும் பல திறமையான நடிகர்களுடன் மிகப் பெரிய அளவில் முழுமையான அல்டிமேட் என்டர்டெய்னராக படம் உருவாகியுள்ளது” என்றார்.