'கங்குவா' சாதனையை முறியடிக்குமா 'கமல் ரஜினி ரீ யூனியன்' வீடியோ

தமிழ்த் திரையுலகத்தில் 47 ஆண்டுகளுக்குப் பிறகு கமல்ஹாசன், ரஜினிகாந்த் மீண்டும் இணைந்து நடிக்க உள்ளனர். அந்தப் படத்திற்கான அதிகாரப்பூர்வ அறிவிப்பை கடந்த வாரம் பிப்ரவரி 21ம் தேதி 'க்ளிம்ப்ஸ்' வீடியோ ஒன்றுடன் வெளியிட்டனர்.

கமல்ஹாசன், ரஜினிகாந்த், படத்தின் இயக்குனர் நெல்சன், இசையமைப்பாளர் அனிருத் ஆகியோர் பங்கேற்ற அந்த வீடியோவிற்கு அவர்களது ரசிகர்களிடம் நல்ல வரவேற்பு கிடைத்தது. இருந்தாலும் சில சர்ச்சைக் கருத்துக்களை மற்ற ரசிகர்கள் வெளியிட்டார்கள். அந்த வீடியோவில் சில கிளாமர் பெண்களை எதற்காக அப்படியான ஒரு உடல்மொழியுடன் காட்ட வேண்டும் என்பதுதான் அவர்களது கேள்வியாக இருந்தது.

தமிழ், தெலுங்கு, ஹிந்தி ஆகிய மொழிகளில் வெளியான அந்த வீடியோ, தமிழில் 32 மில்லியன் பார்வைகளையும், தெலுங்கில் ஒரு மில்லியனையும், ஹிந்தியில் 2 மில்லியனையும் நெருங்கி வருகிறது.

தமிழில் இதற்கு முன்பு வெளிவந்த 'க்ளிம்ப்ஸ்' வீடியோக்களில் சூர்யா நடித்து வெளிவந்த 'கங்குவா' படத்தின் க்ளிம்ப்ஸ் 40 மில்லியன் பார்வைகளைக் கடந்து முதலிடத்தில் உள்ளது. அதன்பின் கடந்த இரண்டு வருடங்களில் வேறு எந்தப் படமும் அதை நெருங்கவில்லை. 'கமல் ரஜினி ரியூனியன்' க்ளிம்ப்ஸ் அந்த சாதனையை முறியடிக்க வாய்ப்புள்ளது.