'கல்கி 2' படப்பிடிப்பு அப்டேட் தந்த அமிதாப் பச்சன்

நாக் அஷ்வின் இயக்கத்தில், பிரபாஸ், அமிதாப்பச்சன், கமல்ஹாசன் மற்றும் பலர் நடிப்பில் 'கல்கி 2898 ஏடி' படத்தின் இரண்டாம் பாகப் படப்பிடிப்பு ஐதராபாத்தில் ஆரம்பமாகியுள்ளது.

அதுபற்றி தன்னுடைய சமூக வலைத்தளத்தில் அப்டேட் கொடுத்துள்ளார் அமிதாப்பச்சன். அமிதாப்பைப் பார்க்க அவருடைய மும்பை இல்லத்தில் ஞாயிற்றுக் கிழமைகளில் ரசிகர்கள் கூடுவது வழக்கம். ரசிகர்கள் காத்திருக்கும் புகைப்படங்கள் சிலவற்றைப் பகிர்ந்த அமிதாப், “ஐதராபாத்தில் படப்பிடிப்பில் இருப்பதால் இந்த ஞாயிறு அவர்களை நான் சந்திக்க முடியாது என்பதைச் சொல்லுங்கள். ஆனாலும் அவர்கள் உறுதிப்படுத்த வருவார்கள். மன்னிக்கவும், வேலைதான் முதலில், மற்றவை பிறகு தான்” என்று குறிப்பிட்டுள்ளார்.

அதன் தொடர்ச்சியாக, ஐதராபாத்தில் 'கல்கி' இரண்டாம் பாகப் படப்பிடிப்புத் தளத்தில் கமல்ஹாசனுடன் இருக்கும் சில புகைப்படங்களைப் பகிர்ந்து, “கிரேட் கமல்ஹாசனுடன் சந்திப்பு… பல ஆண்டுகளுக்குப் பிறகு நாங்கள் ஒன்றாக வேலை செய்ய உள்ளோம், கடைசியாக 'கிராப்தார்' படத்தில். 'கல்கி 2' வேலைகள் ஆரம்பம்,” என்றும் பதிவு செய்துள்ளார்.