தமிழ் சினிமாவில் தொடரும் விவாகரத்து…

தமிழ் சினிமாவில் காதல் கிசுகிசு என்பது அந்தக் காலம் தொட்டு இருக்கிறது. அதன்பின் காதல் திருமணம் செய்து கொண்டார்கள், திருப்பதி சென்று திருமணம் செய்து கொண்டார்கள், வீட்டிற்குத் தெரியாமல் ஓடிப் போய்த் திருமணம் செய்து கொண்டார்கள் என பல பரபரப்பு செய்திகள் வந்துள்ளன.

ஆனால், சமீப காலங்களில் விவாகரத்து செய்திகள் என்பது அதிகமாக வர ஆரம்பித்து அதிர்ச்சியைக் கொடுத்து வருகின்றன. கடந்த சில வருடங்களில் மட்டும் சிலரது பிரிவுகளும், வழக்குகளும், சர்ச்சைகளும் ஆச்சரியத்தையும் ஏற்படுத்தியுள்ளன. காதலித்துத் திருமணம் செய்து கொண்டு குழந்தைகள் பெற்று மகிழ்ச்சியாக சில பல வருடங்கள் சேர்ந்து வாழ்ந்தவர்கள் பிரியும் செய்திகள் வரும் போது, ஏன் இப்படி நடக்கிறது, என்று வியந்து பார்த்தவர்களும் உண்டு.

ஏஆர் ரஹ்மான் - சாயிரா பானு, தனுஷ் - ஐஸ்வர்யா ரஜினிகாந்த், சவுந்தர்யா ரஜினிகாந்த் - அஷ்வின் ராம்குமார், ரவி மோகன் - ஆர்த்தி, ஜிவி பிரகாஷ்குமார் - சைந்தவி, விஷ்ணு விஷால் - ரஜினி அவர்களது வரிசையில் தற்போது விஜய் - சங்கீதா பிரிவு திரையுலகினருக்கும் ரசிகர்களுக்கும் அதிர்ச்சியை ஏற்படுத்தியுள்ளது.

கடந்த சில வருடங்களாகவே இருவரும் பிரிந்து வாழ்ந்து வந்த நிலையில், நேற்று சங்கீதா விவகாரத்து கோரி மனு தாக்கல் செய்துள்ளார். நேற்றிலிருந்து சமூக வலைத்தளங்களில் இது பற்றிய பேச்சுக்கள் வரைமுறை, ஒழுக்கம், கட்டுப்பாடு இல்லாமல் கண்டபடி அவதூறாகப் போய்க் கொண்டிருக்கிறது. சமூக வலைத்தளங்களை சில நடிகர்களின் ரசிகர்கள் இந்த அளவிற்கு மாற்றி வைத்திருக்கிறார்கள் என்பது அதிர்ச்சி கலந்த உண்மை.