பிரபாஸின் அம்மாவாக நடிக்கும் ஜெயப்பிரதா

சீதாராமம் படத்தின் மூலம் கவனம் ஈர்த்த இயக்குனர் ஹனு ராகவபுடி, தற்போது பிரபாஸை வைத்து பவுசி என்கிற படத்தை இயக்கி வருகிறார். இந்த படத்தில் பிரபாஸுக்கு ஜோடியாக இமான்வி இஸ்மாயில் என்பவர் நடிக்கிறார். இவர்கள் தவிர முக்கிய கதாபாத்திரத்தில் பிரபல பாலிவுட் நடிகை ஜெயப்பிரதா பிரபாஸின் அம்மாவாக முக்கிய வேடத்தில் நடித்து வருகிறார்.

கடந்த 52 வருடங்களாக திரையுலகில் பயணித்து வரும் ஜெயப்பிரதா தொடர்ந்து அரசியலில் பயணித்து வருவதால் படங்களில் நடிப்பதில் அதிக ஆர்வம் காட்டுவதில்லை. அதேசமயம் நல்ல கதாபாத்திரங்கள் தேடி வரும்போது மட்டும் நடித்து வருகிறார். அந்த வகையில் தற்போது பவுசி படத்தில் பிரபாஸின் அம்மாவாக நடித்து வருகிறார். மேலும் இந்த படத்தில் அவருடன் நடிகர் மிதுன் சக்கரவர்த்தியும் முக்கிய கதாபாத்திரத்தில் நடிக்கிறார்.

பவுசி படத்தில் நடிப்பது குறித்து ஜெயப்பிரதா கூறும்போது, “இந்த படத்தில் பிரபாஸுடன் இணைந்து நடிப்பது மகிழ்ச்சி. படப்பிடிப்பு தளத்தில் அவரது அர்ப்பணிப்பு உணர்வையும் வேலை பார்க்கும் ஸ்டைலையும் பார்த்து பிரமித்தேன்” என்று கூறியுள்ளார்.

இதில் ஆச்சரியம் என்னவென்றால் கடந்த வருடம் ஜி-5ல் நேரடியாக வெளியான ரிவாஸ் என்கிற படத்தில் ஜெயப்பிரதாவும் மிதுன் சக்கரவர்த்தியும் இணைந்து நடித்திருந்தனர் என்பதும் குறிப்பிடத்தக்கது.