ராம் பொத்தினேனி - தமிழுக்கு வரும் அடுத்த தெலுங்கு நடிகர்

தமிழ் ஹீரோக்களுக்கு எப்படி தெலுங்கிலும் நுழைய வேண்டுமென்ற ஆசை இருக்கிறதோ, அது போலவே தெலுங்கு நடிகர்களுக்கும் தமிழுக்கு வர வேண்டுமென்ற ஆசை இருக்கிறது.

பிரபாஸ், மகேஷ் பாபு, ராம் சரண் ஆகியோரைத் தொடர்ந்து ராம் பொத்தினேனி அடுத்து தமிழுக்கு வர இருக்கிறார். தமிழ் இயக்குனரான லிங்குசாமி தமிழ், தெலுங்கில் இயக்க உள்ள புதிய படத்தில் ராம் கதாநாயகனாக நடிக்கப் போகிறார்.

கடந்த சில தினங்களாகவே இது பற்றிய செய்திகள் வெளிவந்து கொண்டிருந்தன. இன்று அது பற்றிய அதிகாரப்பூர்வ அறிவிப்பை வெளியிட்டுவிட்டார்கள்.

லிங்குசாமி கடைசியாக இயக்கிய 'சண்டக்கோழி 2' படம் தோல்விப் படமாகத்தான் அமைந்தது. லிங்குசாமி இயக்கிய 'ரன், சண்டக்கோழி', உள்ளிட்ட சில படங்கள் தெலுங்கில் டப்பிங் செய்யப்பட்டு அங்கு வரவேற்பைப் பெற்றது. அதனால், அவரும் அங்கு நன்கு அறிமுகமானவர்தான்.

முதன் முதலாக தெலுங்கு நடிகருடன் நேரடி தெலுங்குப் படத்தில் இணைய உள்ளார் லிங்குசாமி. சில வருடங்களுக்கு முன்பு அவரும், அல்லு அர்ஜுனும் இணைய உள்ளதாக அறிவிக்கப்பட்ட ஒரு படம் அறிவிப்புடன் நின்று போனது.