ஏகாம்பரநாதர் கோவிலில் சுகாதாரமின்றி பிரசாதம்

காஞ்சிபுரம் : ஏகாம்பரநாதர் கோவிலில், சுகாதாரமின்றி பிரசாதம் வழங்கப்படுவதாக எழுந்த புகாரின்படி, உணவு பாதுகாப்புத் துறையினர் ஆய்வு செய்து, கோவில் நிர்வாகத்திற்கு எச்சரிக்கை, நோட்டீஸ் வழங்கியுள்ளனர்.

ரசாயனம்: காஞ்சிபுரம் ஏகாம்பரநாதர் கோவிலில், சுவாமிக்கு படைப்பதற்காக பிரசாதம் மற்றும் நிவேதனம் போன்றவை, சமையலறையில் செய்யப்படுகின்றன.அவ்வாறு செய்யப்படும் உணவுகளில், ரசாயன பொருட்கள் அதிகளவில் கலப்பதாகவும், சுகாதாரமான சூழலில் அவை செய்யப்படுவதில்லை எனவும் புகார் எழுந்தது. இது குறித்து, காஞ்சிபுரம் மாவட்ட உணவு பாதுகாப்பு துறைக்கு, பக்தர்கள் சார்பில் புகார் அளிக்கப்பட்டது. இதையடுத்து, உணவு பாதுகாப்பு அலுவலர் தீபா மற்றும் அலுவலர்கள், நேற்று முன்தினம் ஏகாம்பரநாதர் கோவிலில் ஆய்வு செய்தனர்.

அறிவுரை: அப்போது, போதிய சுகாதாரம் இன்றி உணவு சமைப்பது தெரிய வந்தது. மேலும், அங்கிருந்த ரசாயன பவுடரையும், அதிகாரிகள் பறிமுதல் செய்துள்ளனர்.தொடர்ந்து, உணவு பாதுகாப்பு சட்டத்தின் கீழ், கோவில் நிர்வாகத்திற்கு எச்சரிக்கை நோட்டீசும் வழங்கப்பட்டுள்ளது.சுத்தமான சூழலில் சமையல் செய்யவும், கழிவு நீரை முறையாக வெளியேற்றவும் நடவடிக்கை எடுக்க வேண்டும் என, கோவில் அதிகாரிகளுக்கு அறிவுறுத்தப்பட்டு உள்ளது.