தமிழக கோவில் சொத்துக்கள் விவகாரம்: அரசுக்கு பாராட்டு

 தொண்டாமுத்தூர்: தமிழக அறநிலையத்துறையின் கீழ், உள்ள கோவில்களின் சொத்துக்கள் குறித்த ஆவணங்கள் இணையதளத்தில் வெளியிடப்படும் என்ற முடிவிற்கு, ஈஷா அறக்கட்டளை நிறுவனர் சத்குரு பாராட்டு தெரிவித்துள்ளார்.

தமிழக இந்து சமய அறநிலையத்துறையின் கீழ் உள்ள கோவில்களில், கோவில் நிர்வாகம், அலுவலர்கள் பணிகள் மற்றும் விழாக்கள் போன்ற தகவல்களையும்; கோவில்களில் நடைமுறையில் உள்ள பல்வேறு பதிவேடுகளையும்; கோவில் நிலங்கள் மற்றும் கட்டடங்களின் விவரங்கள்; கோவில் பெயரில் உள்ள அசையும் மற்றும் அசையா சொத்துகளில் உரிமை ஆவணங்களையும், இணையதளத்தில் பதிவேற்றம் செய்யப்படும் என, தமிழக அரசு அறிவித்துள்ளது. தமிழக அரசின், இந்த முடிவிற்கு, ஈஷா அறக்கட்டளை நிறுவனர் சத்குரு பாராட்டு தெரிவித்துள்ளார். இதுகுறித்து, ஈஷா அறக்கட்டளை நிறுவனர் சத்குரு தனது டுவிட்டர் பக்கத்தில்,அறநிலையத்துறைக்கும், தமிழக அரசுக்கும் பாராட்டுக்கள். சரியான திசையில் எடுக்கப்பட்டுள்ள வரலாற்று நடவடிக்கை இது. மக்களின் வேண்டுகோளை ஏற்று துரித நடவடிக்கை எடுத்தமை பாராட்டுக்கள். வெளிப்படைத்தன்மை தான் நல்லாட்சிக்கான முதல்படி. நல்வாழ்த்துக்கள் என தெரிவித்துள்ளார். முன்னதாக, ஈஷா அறக்கட்டளை நிறுவனர் சத்குரு கோவில் அடிமை நிறுத்து என்ற இயக்கத்தின் மூலம், அறநிலையத்துறையின் வரவு செலவு கணக்குகளை வெளி தணிக்கை செய்ய வேண்டும். ஆக்கிரமிக்கப்பட்ட கோவில் நிலங்களை மீட்க வேண்டும். கோவில்களுக்கு சொந்தமான கட்டடங்கள் மற்றும் நிலங்களுக்கு தற்போதைய சந்தை நிலவரத்திற்கு ஏற்ப வாடகை நிர்ணயித்து அதை வசூலிக்க வேண்டும் உள்ளிட்ட பல்வேறு கோரிக்கைகளை வலியுறுத்தி உள்ளது குறிப்பிடத்தக்கது.