பரமக்குடியில் கோயில் மற்றும் வீடுகளில் விநாயகர் சதுர்த்தி விழா கோலாகலம்

பரமக்குடி; பரமக்குடியில் உள்ள அனைத்து கோயில்கள் மற்றும் வீடுகளிலும் விநாயகர் சதுர்த்தி விழா கோலாகலமாக கொண்டாடப்பட்டது. மேலும் இந்து முன்னணி சார்பில் 60 இடங்களில் விநாயகர் சிலைகளை பிரதிஷ்டை செய்து வழிபட்டனர்.

பரமக்குடியில் உள்ள பெருமாள், சிவன், விநாயகர் மற்றும் முருகன் கோயில்களில் உள்ள அனைத்து விநாயகர் சன்னதிகளிலும் காலை மற்றும் மாலை நேரங்களில் சிறப்பு அபிஷேக ஆராதனைகள் நடந்தன. தொடர்ந்து அனைத்து வீடுகளிலும் பிள்ளையார் சிலைகளை ஆர்வமுடன் வாங்கி சென்று மக்கள் வழிபாடு நடத்தினர். மேலும் ஹிந்து முன்னணி சார்பில் நகராட்சிக்குட்பட்ட 36 வார்டுகளிலும், 60 இடங்களில் விநாயகர் சிலைகளை பிரதிஷ்டை செய்தனர். தொடர்ந்து பல்வேறு விளையாட்டுப் போட்டிகள், திருவிளக்கு வழிபாடு மற்றும் அன்னதான விழா நடந்தது. இன்று மாலை 4:00 மணிக்கு அனைத்து சிலைகளும் ஊர்வலமாக எடுத்துச் செல்லப்பட்டு, பரமக்குடி பெருமாள் கோயில் முன்பு வைகை ஆற்றில் விஜர்சன நிகழ்ச்சி நடக்கிறது.