தங்க முத்துமாரியம்மன் கோயில் முளைப்பாரி விழா

முதுகுளத்தூர்; முதுகுளத்தூர் காந்திநகர் கிராமத்தில் தங்க முத்துமாரியம்மன் கோயில் 3ம் ஆண்டு முளைப்பாரி விழா நடந்தது. கடந்த ஒரு வாரத்திற்கு முன்பு காப்பு கட்டுதலுடன் துவங்கியது. தினந்தோறும் அம்மனுக்கு சிறப்புபூஜை நடந்தது. பெண்கள் கும்மியடித்தும், ஆண்கள் ஒயிலாட்டம் ஆடியும் வந்தனர். 108 விளக்கு பூஜை நடந்தது.வழிவிடு முருகன் கோயிலில் இருந்து பஜார் உட்பட முக்கிய வீதிகள் வழியாக பக்தர்கள் பால்குடம், அக்கினி சட்டி,வேல்குத்தி நேர்த்திக்கடன் செலுத்தினர். தங்க முத்துமாரியம்மனுக்கு பால், சந்தனம், மஞ்சள் உட்பட பொருட்களால் அபிஷேகம்,தீபாராதனை நடந்தது. முளைக்கொட்டு திண்ணையில் இருந்து சக்திகரகம், முளைப்பாரி தூக்கி முக்கிய வீதிகளில் ஊர்வலமாக சென்று தண்ணீரில் கரைத்தனர். அன்னதானம் வழங்கப்பட்டது. விழாவில் முதுகுளத்தூர் அதனை சுற்றியுள்ள பகுதியிலிருந்து பலரும் கலந்து கொண்டனர்.