ஸ்ரீ சிவன் ஸார் ஜெயந்தி மஹோற்சவ விழா பாரம்பரிய இசை நிகழ்ச்சியோடு நிறைவு

கோவை: காஞ்சி மஹாபெரியவாளின் தம்பியும் மஹானுமான, சத்குரு ஸ்ரீ சிவன் ஸார் அவதார தினம் ஜெயந்தி மஹோத்ஸவமாக, ராம்நகர் சத்தியமூர்த்தி ரோட்டிலுள்ள ஸ்ரீ ஐயப்பன் பூஜா சங்கத்தில் நேற்று நடந்தது.

இதில் ஸ்ரீ சங்கரா கண் மருத்துவமனை நிறுவனர் பத்மஸ்ரீ ரமணி பேசியதாவது: மாதா, பிதாவுக்கு அடுத்து குரு. அதற்கடுத்து தெய்வம். ஒவ்வொருவரது வாழ்விலும் நல் வழி காட்டுபவரே குரு. அவர் வழியாகவே கல்வி, இசை, நாட்டியம், நாடகம் என்று பல திறமைகளை கற்க முடியும். அடுத்த தலைமுறைக்கு கலை, இலக்கியம், பக்தி, இசை, தொழில்நுட்பம், கல்வி, அறிவுசார் வளர்ச்சி, பண்டிகை, விழாக்கள், உணவு பழக்க வழக்கம், உடல் ஆரோக்கியம், சுகாதாரம், அனுசரித்து பேசுதல், விஞ்ஞானமும் மெய்ஞானமும் சேர்ந்து இருக்க வேண்டும். குருவிடமிருந்தே இவற்றை கற்க முடியும். கற்றவை சேதாரமின்றி அப்படியே அடுத்த சந்ததிக்கு போய் சேர, முயற்சி செய்ய வேண்டும். அதற்காக நாம் குருவை போற்றி வணங்குகிறோம். இவ்வாறு அவர் பேசினார். இதில் ஸ்ரீ கிருஷ்ணா ஸ்வீட்ஸ் கிருஷ்ணன், ஸ்ரீ ஐயப்பன் பூஜா சங்க செயலாளர் சுப்ரமணியம், சிவசாகரம் டிரஸ்ட் நிறுவன தலைவர் சிவராமன், மஹா பெரியவாளின் அணுக்க தொண்டரான ஸ்ரீ கணேச சர்மா உள்ளிட்டோர் பங்கேற்றனர். மிருதங்க வித்வான் சாய்சங்கர், கீபோர்டு இசை கலைஞர் விக்னேஸ்வர், வாய்ப்பாட்டு கலைஞர் கீர்த்தனா ஆகியோரது பாரம்பரிய கர்நாடக இசை நிகழ்ச்சி நடந்தது. திரளானோர் பங்கேற்றனர்.