ராமாயணத்துக்கு தனி தர்மமும், குணமும் உண்டு

மதுரை: மதுரை தல்லாகுளம் லட்சுமிசுந்தரம் ஹாலில், அகில பாரத ஸாது சங்கம் சார்பில், தினமும் ஸ்ரீமத் வால்மீகி ராமாயண சொற்பொழிவு நடக்கிறது.

இதில் ‘பஞ்சவடி’ என்ற தலைப்பில் ரெங்கன் ஜி சிஷ்யர்ஷ்யாம் சுந்தர் பேசியதாவது:ராமரின் வனவாசத்தை தடுத்து நிறுத்த தந்தை தசரதர் உட்பட பலர் முயன்றும், முடியவில்லை.

காட்டில் ராமர் நுழையும்போது, அங்கிருந்த ரிஷிகள் கைக்கூப்பி நின்று வரவேற்றனர். ராமருக்கு பெரியவர்களிடம் உட்கார்ந்து அவர்களின் கதைகளை கேட்பது பிடிக்கும். நாம் இன்று பெரியவர்களிடம் பழகுவதே கிடையாது.

நம் சனாதன தர்மத்தில் சொல்வதற்கு ஏராளமான கதைகள் இருந்தாலும், கலாசாரத்தை அறிந்துகொள்ள முடியாமல் தவிக்கிறோம். அதற்கு காரணம் கதைகள் சொல்லக்கூடிய பெரியவர்களுக்கும், நமக்குமான இடைவெளி அதிகரித்து விட்டது.

வாழ்க்கையைரசித்து வாழ்வது எப்படி என்பதைலட்சுமணன் மூலம் அறியலாம்.

அந்த வகையில் காட்டில் லட்சுமணன் ரசித்து அமைத்த ஆசிரமத்தை கண்ட ராமருக்கு தனது அரண்மனையே மறந்து விட்டது.

அவர் லட்சுமணனிடம், அப்பா தசரதர் மறையவில்லை; உன் ரூபத்தில் தான் இருக்கிறார். உன்னைப் பார்க்கும்போது அப்பா நினைவு வருகிறது என்றார்.

ராமாயணம் ஒரு காவியம் என்று வால்மீகி வரையறுக்கிறார். ஆனால் இதில் வரும் சம்பவங்கள் உண்மையாக நடந்தவை என்பதால் இதிகாசம் என்றும் சொல்கிறோம். ராமாயணத்திற்கு என்று தனிதர்மமும், குணமும் உண்டு.

அதை உணர ராமாயணத்தை ஆழமாக அறிவது அவசியம்.ராமாயணபாராயணம் செய்வோருக்கு எந்தவொரு குறையும் வாழ்வில் வராது என்றார்.

இன்று (அக்.6) மாலை 4:00 மணிக்கு இச்சொற்பொழிவு தொடர்கிறது. அகில பாரத ஸாது சங்கத்தினர் ஏற்பாடு செய்துள்ளனர்.