கூடலுார் மந்தையம்மன் கோயில் விழா: முளைப்பாரி எடுத்து வழிபாடு

கூடலுார்: கூடலுார் மந்தையம்மன் கோயில் விழாவில் நூற்றுக்கணக்கானோர் முளைப்பாரி எடுத்து வழிபட்டனர்.

கூடலுார் மந்தையம்மன் கோயில் விழா சிறப்பு பூஜைகளுடன் துவங்கியது. அதிகாலை பெண்கள் மாவிளக்கு எடுத்து வழிபட்டனர். அம்மனுக்கு சிறப்பு அலங்காரம் செய்யப்பட்டிருந்தது. பொங்கல் வைத்து பக்தர்கள் நேர்த்திக்கடன் செலுத்தினர். கரகாட்டம் உள்ளிட்ட கலை நிகழ்ச்சிகள் நடந்தன. விழாவைத் தொடர்ந்து ஆண்களுக்கான மாரத்தான் போட்டி நடந்தது. கள்ளர் சமுதாயத் தலைவர் பாண்டியன், முன்னாள் சமுதாயத் தலைவர் முத்துக்குமார், செயலாளர் அறிவழகன் முன்னிலையில், முன்னாள் நகராட்சி துணைத் தலைவர் கரிகாலன் துவக்கி வைத்தார். அரசமரம் பஸ் ஸ்டாப்பில் இருந்து லோயர்கேம்ப் பென்னிகுவிக் மணிமண்டபம் வரை சென்று திரும்பும் வகையில் 18 கி.மீ., தூரம் நிர்ணயம் செய்யப்பட்டிருந்தது. சிறியவர் முதல் பெரியவர் வரை 200க்கும் மேற்பட்டோர் கலந்து கொண்டனர். முதல் 6 இடங்களை பிடித்தவர்களுக்கு ரொக்க பரிசு, கேடயம் வழங்கப்பட்டது. மாலையில் பக்தர்கள் சாமி வேடம் அணிந்தும், பெண்கள் மழை வேண்டி முளைப்பாரி எடுத்தும் முக்கிய வீதிகள் வழியாக ஊர்வலமாக சென்று கோயிலை அடைந்தனர். இதற்கான ஏற்பாடுகளை கள்ளர் சமுதாயத்தினர் செய்திருந்தனர்.