பணம் வேண்டாம்னு சொல்வாரோ?

ம.தி.மு.க., பொதுச்செயலர் வைகோ, ராஜ்யசபா உறுப்பினராக இருந்தபோது, அவரது எம்.பி., நிதியில் இருந்து, 35 லட்சம் ரூபாய் மதிப்பில், துாத்துக்குடி மாவட்டம், கடம்பூர் கே.சிதம்பராபுரத்தில், சிறுவர் பூங்கா அமைக்கப்பட்டது. சமீபத்தில் நடந்த இந்த பூங்காவின் திறப்பு விழாவில், ம.தி.மு.க., முதன்மை செயலரும், திருச்சி எம்.பி.,யுமான துரை பங்கேற்று, பூங்காவை திறந்து வைத்தார். அவர் பேசும்போது, 'மக்கள் ஜாதி, மதம், அரசியல் கட்சிகளை கடந்து, நல்லவர்களுக்கு ஓட்டு போட்டு தேர்ந்தெடுக்க வேண்டும். ஓட்டு போட பணம் கொடுத்தால் வாங்கி கொள்ளுங்கள்; ஆனால், பணம் கொடுத்தவனுக்கு ஓட்டு போடாதீர்கள். அவர்கள் கொடுத்தது உங்கள் பணம் தான்...' என, ஆவேசமாக பேசினார். கூட்டத்தில் இருந்த தொண்டர் ஒருவர், 'வர்ற சட்டசபை தேர்தலில், நம்ம கட்சி வேட்பாளர்கள் போட்டியிடும் தொகுதிகள்ல, ஆளுங்கட்சியினர் பணம் தந்தாலும், வேண்டாம்னு சொல்லிடுவாரோ...?' என, முணுமுணுத்தபடியே கிளம்பினார்.