சூரிய மின்சக்தி திட்டம் 30 லட்சம் வீடுகள் இணைப்பு

புதுடில்லி: பிரதமர் மோடி, 'பி.எம்., சூர்ய கர்' எனப்படும் இல்லந்தோறும் சூரிய மின்சக்தி திட்டத்தை, 2024 பிப்ரவரியில் துவக்கினார். இந்த திட்டத்தின் கீழ், வீடுகளின் மேல் தளத்தில் சூரிய மின்சக்தி தகடுகள் நிறுவப்படுகின்றன. 2027க்குள், 1 கோடி வீடுகளில் இந்த அமைப்புகளை நிறுவ இலக்கு நிர்ணயிக்கப்பட்டுள்ளது. இதற்காக, 12 பொதுத்துறை வங்கிகள் மூலம் குறைந்த வட்டி விகிதத்தில், 2 லட்சம் ரூபாய் வரை கடனுதவி வழங்கப்படுகின்றன. இந்நிலையில், தற்போது இத்திட்டத்தின் கீழ் 30 லட்சம் வீடுகளில் சூரிய மின் உற்பத்திக்கான அமைப்புகள் நிறுவப்பட்டுள்ளன. இது குறித்து மத்திய அமைச்சர் பிரகலாத் ஜோஷி வெளியிட்ட அறிக்கை: நாடு முழுதும் 30 லட்சம் குடும்பங்கள் சூரிய சக்தியை பயன்படுத்தி மின் கட்டணத்தை சேமிக்கின்றன. நாட்டின் துாய்மையான எரிசக்தி என்ற பயணத்தில் இது பெருமைக்குரிய மைல்கல். இத்திட்டத்தின் இலக்கு எண்ணிக்கையான, 1 கோடி வீடுகளில் சூரிய மின் அமைப்புகள் நிறுவப்பட்டால், அடுத்த 25 ஆண்டுகளில், ஒரு லட்சம் கோடி யூனிட் புதுப்பிக்கத்தக்க மின்சாரம் உற்பத்தியாகும். இதன் மூலம், 72 கோடி டன் கார்பன் டையாக்சைடு வெளியேற்றம் குறையும். இவ்வாறு அதில் கூறப்பட்டுள்ளது.