கேரளாவை வீழ்த்தியது கோவா: ஐ.எஸ்.எல்., கால்பந்தில் அபாரம்

கொச்சி: ஐ.எஸ்.எல்., கால்பந்து லீக் போட்டியில் கோவா அணி 1-0 என கேரளாவை வீழ்த்தியது.இந்தியன் சூப்பர் லீக் (ஐ.எஸ்.எல்.,) கால்பந்து 11வது சீசன் நடக்கிறது. கேரள மாநிலம் கொச்சியில் நடந்த லீக் போட்டியில் கேரளா, கோவா அணிகள் மோதின. ஆட்டத்தின் 40வது நிமிடத்தில் கோவா அணியின் போரிஸ் சிங் ஒரு கோல் அடித்தார். இதற்கு கேரளா அணியினரால் பதிலடி கொடுக்க முடியவில்லை. முதல் பாதி முடிவில் கோவா அணி 1-0 என முன்னிலையில் இருந்தது.இரண்டாவது பாதியில் கடைசி நிமிடம் வரை போராடிய கேரளா அணியினரால் ஒரு கோல் கூட அடிக்க முடியவில்லை. ஆட்டநேர முடிவில் கோவா அணி 1-0 என்ற கணக்கில் வெற்றி பெற்றது.இதுவரை விளையாடிய 9 போட்டியில், 4 வெற்றி, 3 'டிரா', 2 தோல்வி என 15 புள்ளிகளுடன் கோவா அணி 5வது இடத்துக்கு முன்னேறியது. கேரளா அணி 11 புள்ளிகளுடன் (3 வெற்றி, 2 'டிரா', 5 தோல்வி) 9வது இடத்தில் நீடிக்கிறது.