மோகன் பகான் கலக்கல் வெற்றி: ஐ.எஸ்.எல்., கால்பந்தில்

கோல்கட்டா: ஐ.எஸ்.எல்., கால்பந்து லீக் போட்டியில் மோகன் பகான் அணி 4-2 என வடகிழக்கு யுனைடெட் அணியை வீழ்த்தியது.இந்தியன் சூப்பர் லீக் (ஐ.எஸ்.எல்.,) கால்பந்து 10வது சீசன் நடக்கிறது. கோல்கட்டாவில் நடந்த லீக் போட்டியில் மோகன் பகான், வடகிழக்கு யுனைடெட் அணிகள் மோதின. ஆட்டத்தின் 6வது நிமிடத்தில் வடகிழக்கு அணிக்கு கிடைத்த 'பெனால்டி' வாய்ப்பில் டோமி ஜூரிக் ஒரு கோல் அடித்தார். இதற்கு 'ஸ்டாப்பேஜ்' நேரத்தில் மோகன் பகான் அணியின் லிஸ்டன் கோலாகோ (45+1வது நிமிடம்), ஜேசன் கம்மிங்ஸ் (45+4வது) தலா ஒரு கோல் அடித்து பதிலடி கொடுத்தனர். முதல் பாதி முடிவில் மோகன் பகான் அணி 2-1 என முன்னிலையில் இருந்தது.இரண்டாவது பாதியில் எழுச்சி கண்ட வடகிழக்கு அணிக்கு 50வது நிமிடத்தில் ஜூரிக் மீண்டும் ஒரு கோல் அடித்தார். பின் சுதாரித்துக் கொண்ட கோல்கட்டா அணிக்கு டிமிட்ரி பெட்ராடோஸ் (53வது நிமிடம்), சஹால் அப்துல் சமத் (56வது) தலா ஒரு கோல் அடித்து கைகொடுத்தனர். கடைசி நிமிடம் வரை போராடிய வடகிழக்கு அணியினரால் கூடுதலாக கோல் அடிக்க முடியவில்லை.ஆட்டநேர முடிவில் மோகன் பகான் அணி 4-2 என்ற கணக்கில் வெற்றி பெற்றது. இதுவரை விளையாடிய 14 போட்டியில், 9 வெற்றி, 2 'டிரா', 3 தோல்வி என 29 புள்ளிகளுடன் மோகன் பகான் அணி 2வது இடத்துக்கு முன்னேறியது.