காலிறுதியில் இந்திய ஜோடி

லாஸ் வேகாஸ்: அமெரிக்காவில் சர்வதேச டேபிள் டென்னிஸ் தொடர் நடக்கிறது. ஆண்கள் இரட்டையரில் இத்தொடரின் 'நம்பர்-7' அந்தஸ்து பெற்ற இந்தியாவின் மானவ் தக்கார், மனுஷ் ஷா ஜோடி, இரண்டாவது சுற்றில் குரோஷியாவின் டோமிஸ்லவ், லுபோமிர் ஜோடியை சந்தித்தது. முதல் செட்டை இந்திய ஜோடி 12-14 என இழந்தது. பின் சுதாரித்த இந்திய ஜோடி அடுத்த 3 செட்டுகளையும் 11-9, 11-8, 11-7 என வசப்படுத்தியது. முடிவில் இந்திய ஜோடி 3-1 என்ற கணக்கில் வெற்றி பெற்று காலிறுதிக்கு முன்னேறியது. கலப்பு இரட்டையர் காலிறுதியில் இந்தியாவின் தியா, மனுஷ் ஷா ஜோடி, ஹாங்காங்கின் வாங் சுன், துா ஹோய் கெம் ஜோடியை எதிர்கொண்டது. இதில் இந்திய ஜோடி 2-3 என (3-11, 7-11, 11-5, 11-4, 7-11) போராடி தோல்வியடைந்தது.