கைதிகளுக்கு பீடி கட்டு சப்ளை புழல் சிறை காவலர் சஸ்பெண்ட்

சென்னை, கைதிகளிடம், 2,000 ரூபாய் வசூலித்து, பீடி கட்டுகளை சப்ளை செய்து வந்த காவலர் 'சஸ்பெண்ட்' செய்யப்பட்டார். சென்னை புழல் மத்திய சிறையில், கைதிகளிடம் கஞ்சா, பீடி, சிகரெட் உள்ளிட்ட போதை பொருட்கள் புழக்கம் அதிகரித்து வருகிறது. இதன் பின்னணியில் சிறை காவலர்கள் இருப்பதாக புகார் எழுந்தது. இதையடுத்து, காவலர்களின் நடவடிக்கைகளை ரகசியமாக கண்காணிக்க வேண்டும் என, நுண்ணறிவு பிரிவு போலீசாருக்கு, சிறைத்துறை இயக்குநர் மகேஷ்வர் தயாள் உத்தரவிட்டுள்ளார். இந்நிலையில், நேற்று முன்தினம், சிறை வளாகத்தில் குப்பை எடுத்துச்செல்லும் வாகனத்தை, முதல் நிலை காவலர் கருப்பையா இயக்கியுள்ளார். அந்த வாகனத்தை, சிறை அதிகாரிகள் திடீரென ஆய்வு செய்தனர். அதில், குப்பைக்குள் பீடி கட்டுக்கள் மறைத்து வைத்து இருந்தது தெரியவந்தது. விசாரணையில், கைதிகளிடம் 2,000 ரூபாய் வசூலித்து, பீடி கட்டுகளை சிறைக்குள் கடத்தி வந்து, சப்ளை செய்து வந்தது தெரியவந்தது. இதையடுத்து, கருப்பையா நேற்று 'சஸ்பெண்ட்' செய்யப்பட்டார்.