சென்னை: 'சென்னை பெருநகரில், சாலை தொகுப்பு திட்டத்தை செயல்படுத்துவதால் வீடுகளுக்கு பாதிப்பு ஏற்படும் நிலை உள்ளது. அதனால், அந்த திட்டத்தை கைவிட வேண்டும்' என, கிரெடாய் உள்ளிட்ட பல்வேறு ரியல் எஸ்டேட் அமைப்புகள், அரசிடம் முறையீடு செய்துள்ளன. சென்னை பெருநகரில், போக்குவரத்து நெரிசல் பிரச்னைக்கு தீர்வாக புறவழிச்சாலை, வெளிவட்ட சாலை, எல்லை சாலை ஆகிய திட்டங்கள் அறிவிக்கப்பட்டன. இதில் சென்னை புறவழிச்சாலை, வெளிவட்ட சாலை ஆகியவை, மக்கள் பயன்பாட்டில் வந்துள்ளன. இந்த சாலைகளை ஒட்டி அமைந்துள்ள கிராமங்களில், முறையான சாலை வசதி இல்லாதது தெரியவந்தது. இதற்காக, உள்ளூர் சாலைகளை விரிவாக்கம் செய்வது, தேவையான இடங்களில் புதிய சாலைகளை அமைப்பது என, சென்னை பெருநகர வளர்ச்சி குழுமம் எனும் சி.எம்.டி.ஏ., முடிவு செய்தது. இதற்காக சாலை தொகுப்பு திட்டம் உருவாக்கப்பட்டது. இதன்படி, 450 இடங்களில் சாலைகளை விரிவாக்கம் செய்வது, புதிய சாலைகளை அமைப்பது என, முடிவு செய்யப்பட்டது. இது தொடர்பான பணிகளை சி.எம்.டி.ஏ., முடுக்கி விட்டுள்ளது. இதற்கான பணிகளை, நெடுஞ்சாலைத் துறை மேற்கொள்ள திட்டமிட்டுள்ளது. இந்நிலையில், இந்திய ரியல் எஸ்டேட் மேம்பாட்டாளர்கள் சங்கங் களின் கூட்டமைப்பான 'கிரெடாய்' உட்பட பல்வேறு அமைப்புகள், தலைமை செயலர் முருகானந்தத்திடம் மனு அளித்துள்ளன. அதில், சென்னை பெருநகரில் உத்தேசிக்கப்பட்டுள்ள சாலை தொகுப்பு திட்ட பணிகளை கைவிட வேண்டும் என, வலியுறுத்தப்பட்டுள்ளது. இத்திட்டத்தால், சாலைகளை விரிவாக்கம் செய்வதால் ஏற்கனவே அங்கீகாரம், அனுமதியுடன் கட்டப்பட்ட குடியிருப்பு திட்டங்கள் பாதிக்கப்படும். இதனால், வீடு, மனை வாங்கிய மக்கள் பாதிக்கப்படுவர். எனவே, மக்கள் நலன் கருதி, சாலை தொகுப்பு திட்ட பணிகளை கைவிட வேண்டும் என, அந்த மனுவில் கூறப்பட்டுள்ளது.