கலங்கலாக வரும் குடிநீர் செம்மஞ்சேரியில் தவிப்பு

செம்மஞ்சேரி,:செம்மஞ்சேரியில், மண் கலந்து கலங்கலாக குடிநீர் வருவதாக, அப்பகுதி மக்கள் வேதனை தெரிவித்துள்ளனர். சோழிங்கநல்லுார் மண்டலம், 200வது வார்டு, செம்மஞ்சேரி, ஜெவகர் நகர், எழில்முக நகரில், 11 தெருக்களில் 300 வீடுகள் உள்ளன. தெருக்களில், தலா 3,000 லிட்டர் கொள்ளளவு கொண்ட, 21 தொட்டிகள் வைக்கப்பட்டு உள்ளன. இதில், 4, 5 நாட்களுக்கு ஒரு முறை லாரி குடிநீர் நிரப்பப்படும். தெருக்குழாயிலும் போதிய குடிநீர் வரவில்லை. பத்து நாட்களாக, தொட்டியில் உள்ள குடிநீர், மண் கலந்து கலங்கலாக வருவதால், சமைக்கவும், குடிக்கவும் முடியவில்லை எனவும், குளித்தால் தலையில் மண் படிவதாகவும், அப்பகுதி மக்கள் வேதனையடைந்து உள்ளனர். தெரு தொட்டிகள், லாரி தொட்டிகள் முறையாக சுத்தம் செய்யப்படுவதில்லை என, அவர்கள் குற்றஞ் சாட்டுகின்றனர். குடிநீர் வாரிய அதிகாரிகள் தலையிட்டு, சுகாதாரமான குடிநீர் வினியோகிப்பதை உறுதி செய்ய வேண்டும் என, அவர்கள் கோரிக்கை விடுத்துள்ளனர்.