சிகிச்சை கட்டணம் தாமதம் இழப்பீடு வழங்க உத்தரவு

கோவை: ராமநாதபுரம், நஞ்சுண்டாபுரம் ரோட்டை சேர்ந்த ஸ்ரீ நிவாஸ், ஸ்டார் ெஹல்த் இன்சூரன்ஸ் நிறுவனத்தில், குடும்ப மருத்துவ காப்பீடு திட்டத்தில் சேர்ந்தார். அதன்படி 2023, அக்., 3ல் ஓராண்டுக்கான பிரீமிய தொகை செலுத்தினார். இந்நிலையில் அவருக்கு உடல்நிலை பாதிக்கப்பட்டதால், தனியார் மருத்துவமனையில் சேர்ந்து சிகிச்சை பெற்றார். இதற்கான மருத்துவ கட்டணம், ஒரு லட்சம் ரூபாய் மருத்துவமனையில் செலுத்தினார். அந்த பணத்தை வழங்க கோரி, இன்சூரன்ஸ் நிறுவனத்திற்கு விண்ணப்பித்தார். பணம் வழங்காமல் விண்ணப்பத்தை நிராகரித்தனர். வக்கீல் நோட்டீஸ் அனுப்பிய பிறகு, ஒரு ஆண்டு கழித்து மருத்துவ கட்டணத்தை, இன்சூரன்ஸ் நிறுவனம் திருப்பி கொடுத்தது. காலதாமதமாக, 'கிளைம்' தொகை கொடுத்ததால், இழப்பீடு வழங்க கோரி, கோவை நுகர்வோர் குறைதீர் ஆணையத்தில் வழக்கு தாக்கல் செய்தார். விசாரித்த ஆணைய தலைவர் தங்கவேல் பிறப்பித்த உத்தரவில், 'இன்சூரன்ஸ் நிறுவனம் சேவை குறைபாடு செய்துள்ளதால், மனுதாரருக்கு ஏற்பட்ட மன உளைச்சலுக்கு இழப்பீடாக, 15,000 ரூபாய், வழக்கு செலவு, 5,000 ரூபாய் வழங்க வேண்டும்' என்று தெரிவித்துள்ளனர்.