வாலிபரை தாக்கிய 3 பேர் கைது

கடலுார்: வாலிபரை தாக்கிய மூன்று பேரை திருப்பாதிரிப்புலியூர் போலீசார் கைது செய்தனர். கடலுார் கே.என்.பேட்டையைச் சேர்ந்தவர் அருண்பாண்டியன்,34; நேற்று முன்தினம் மாலை கே.என்.பேட்டை பஸ் நிறுத்தம் அருகே, தனது மாமா கோவிந்தன்,80; என்பவருடன் நின்று கொண்டிருந்தார். அப்போது அங்கு வந்த அதே பகுதியை சேர்ந்த பாண்டியன் மகன் சதீஷ்குமார்,23; மகேந்திரன் மகன் தமிழ்வாணன்,20; மற்றும் 16 வயது சிறுவன், 3 பேரும் கோவிந்தனை கிண்டல் செய்தனர். இதை அருண்பாண்டியன் தட்டிக்கேட்டபோது வாய்த்தகராறு ஏற்பட்டது. அதில் ஆத்திரமடைந்த சதீஷ்குமார், தமிழ்வாணன் உள்ளிட்ட மூன்று பேரும் சேர்ந்து, அருண்பாண்டியனை திட்டி தாக்கினர். அதில் காயமடைந்த அருண்பாண்டியன் கடலுார் அரசு மருத்துவமனையில் சிகிச்சை பெற்று வருகிறார். புகாரின் பேரில் திருப்பாதிரிப்புலியூர் போலீசார் வழக்குப்பதிந்து சதீஷ்குமார், தமிழ்வாணன், 16வயது சிறுவன் ஆகிய, 3 பேரை கைது செய்தனர்.