தேசிய பேரிடர் மீட்பு குழு கடலுார் வருகை

கடலுார்: மாவட்டத்தில் மழை முன்னெச்சரிக்கை நடவடிக்கையாக, தேசிய பேரிடர் மீட்பு குழுவினர் வருகை தந்துள்ளனர். தமிழகத்தில் வடகிழக்கு பருவமழை தீவிரமடைந்துள்ளது. இதன் காரணமாக கடலுார் மாவட்டத்தில் கடந்த சில நாட்களாக தொடர் மழை பெய்து வருகிறது. மாவட்டத்தில் முன்னெச்சரிக்கையாக மாநில பேரிடர் மீட்பு படையினர் 60 பேர், கடலுார் அடுத்த குடிகாடு பாதுகாப்பு மையத்தில் தங்க வைக்கப்பட்டுள்ளனர். இந்நிலையில், 'டிட்வா' புயல் காரணமாக கடலுார் மாவட்டத்திற்கு ரெட் அலர்ட் விடுக்கப்பட்டுள்ளது. இதனால் மாவட்டத்திற்கு அரக்கோணத்தில் இருந்து துணை கமாண்டட் கெய்க்வாட் சங்கேத் தட்டியா சாகேப் தலைமையில், 34 பேர் கொண்ட தேசிய பேரிடர் மீட்பு படையினர் அனுப்பி வைக்கப்பட்டுள்ளனர். கலெக்டர் அலுவலகத்திற்கு நேற்று வந்த இவர்களுக்கு, கலெக்டர் சிபி ஆதித்யா செந்தில்குமார் பேரிடர் மீட்பு குறித்து அறிவுரை வழங்கினார். பின், நத்தப்பட்டு சமுதாய நலக்கூடத்தில் தங்க வைக்கப்பட்டனர்.