விலை உயர்ந்த வெண்டைக்காய்

ஒட்டன்சத்திரம்: திண்டுக்கல் மாவட்டம் ஒட்டன்சத்திரம் மார்க்கெட்டில் வெண்டைக்காய் விலை ஒரே வாரத்தில் கிலோ ரூ.35 ஆக உயர்ந்துள்ளது. ஒட்டன்சத்திரம் மற்றும் சுற்றிய பகுதிகளில் வெண்டைக்காய் அதிகமாக பயிரிடப்படுகிறது. ஏழு நாட்களுக்கு முன்பு வரை விளைச்சல் அதிகம் இருந்ததால் மார்க்கெட்டுக்கு வரத்தும் அதிகம் இருந்தது. தற்போது விளைச்சல் முடியும் தருவாயில் வரத்து குறைந்தது. தேவைக்கேற்ப வெண்டைக்காய் வரத்து இல்லாததால் விலையும் நாளுக்கு நாள் அதிகரித்தது. கிலோ ரூ.10க்கு விற்ற வெண்டைக்காய் நேற்று கிலோ ரூ. 35க்கு விற்பனையானது. கமிஷன் கடை உரிமையாளர் மூர்த்தி கூறுகையில், ''வரும் நாட்களில் வரத்து குறையும் என்பதால் விலை மேலும் அதிகரிக்க வாய்ப்புள்ளது,'' என்றார்.