அம்மா விளையாட்டு பூங்காவில் உபகரணங்கள் பாழாகும் அவலம்

கோனேரிகுப்பம்:கோனேரிகுப்பம் ஊராட்சி, எச்.எஸ்., அவென்யூவில், ஆறு ஆண்டுகளுக்கு முன் அம்மா விளையாட்டு பூங்கா அமைக்கப்பட்டது. இப்பூங்காவில் எச்.எஸ்., அவென்யூ மற்றும் சுற்றியுள்ள பல்வேறு நகரினர் நடைபயிற்சி மேற்கொண்டு வருகின்றனர். சிறுவர்களும் விடுமுறை நாட்களில் விளையாட்டு உபகரணங்களில் விளையாடி வருகின்றனர்.அதேபோல, உள்ளரங்க உடற்பயிற்சி கூடத்தை, அப்பகுதியைச் சேர்ந்த இளைஞர்கள் பயன்படுத்தி வந்தனர். இந்நிலையில், முறையான பராமரிப்பு இல்லாததால், உடற்பயிற்சி கூடத்தில் உள்ள ‛பிட்னஸ்' உபகரணங்கள் பல பழுதடைந்து உள்ளன. மேலும், சில உபகரணங்கள் மாயமாகியுள்ளன. இதனால், உடற்பயிற்சி கூடத்திற்கு வரும் இளைஞர்கள், தங்கள் ஆரோக்கியத்தை உறுதி செய்ய முடியாத சூழல் உள்ளது. லட்சக்கணக்கான ரூபாய் செலவில் அமைக்கப்பட்ட உடற்பயிற்சி உபகரணங்கள் பயன்பாடின்றி வீணாகி வருகின்றன.எனவே, உடற்பயிற்சி உபகரணங்களை பழுதுநீக்கி பயன்பாட்டிற்கு கொண்டு வர, காஞ்சிபுரம் வட்டார வளர்ச்சி அலுவலக அதிகாரிகள் நடவடிக்கை எடுக்க வேண்டும் என, எச்.எஸ்., அவென்யூ பகுதி இளைஞர்கள் வலியுறுத்தி உள்ளனர்.