சின்னமதுரப்பாக்கம் சாலை வளைவில் தடுப்பு அமைக்க வலியுறுத்தல்
வாலாஜாபாத்,:சின்னமதுரப்பாக்கம் சாலையில் அடுத்தடுத்துள்ள இரண்டு அபாயகரமான வளைவுகளில் விபத்து ஏற்படாமல் தடுக்க, தடுப்பு அமைக்க வேண்டும் என, வாகன ஓட்டிகள் வலியுறுத்தி வருகின்றனர். வாலாஜாபாத் ஒன்றியம், வெண்பாக்கம் ஊராட்சிக்கு உட்பட்டது, சின்னமதுரப்பாக்கம் கிராமம். இக்கிராமத்தில் இருந்து, தொள்ளாழி உள்ளிட்ட கிராமங்களுக்கு செல்லும் சாலை உள்ளது. குறுகிய இச்சாலையில், சின்னமதுரப்பாக்கம் குடியிருப்பையொட்டி அடுத்தடுத்து இரண்டு இடங்களில் அபாயகரமான வளைவுகள் உள்ளன. இந்த வளைவு பகுதிகளில் சாலையை ஒட்டிய நிலங்கள் தாழ்வாக அமைந்துள்ளன. இதனால், இச்சாலை வளைவுகளில் பயணிக்கும்போது வாகன ஓட்டிகள் விபத்தில் சிக்கும் நிலை உள்ளது. வேகமாக வரும் வாகனங்கள் சாலையோர தாழ்வான பகுதியில் கவிழ்ந்து விபத்து ஏற்படும் அபாயம் உள்ளது. எனவே, சின்னமதுரப்பாக்கம் வளைவுகளில், சாலையையொட்டி இரும்பு தடுப்புகள் அமைக்க நடவடிக்கை எடுக்க வேண்டும் என, வாகன ஓட்டிகள் வலியுறுத்தி வருகின்றனர்.