விநாயகர் சிலைகள் விற்பனை மும்முரம்

கிருஷ்ணகிரி, இன்று விநாயகர் சதுர்த்தியை முன்னிட்டு, கிருஷ்ணகிரி பழையபேட்டை, புதுப்பேட்டை, ராயக்கோட்டை சாலையில் நேற்று, அரை அடி முதல், இரண்டரை அடி வரை களிமண்ணால் ஆன விநாயகர் சிலைகள், 100 முதல், 1,300 ரூபாய் வரையும், 5 அடி முதல், 10 அடி வரை உள்ள விநாயகர் சிலைகள், 5,000 முதல் 16,000 ரூபாய் வரை விற்பனை செய்யப்பட்டது. விநாயகர் சிலைக்கு வைக்கும் குடை, 40 முதல், 100 ரூபாய் வரை விற்பனையானது. விநாயகர் சதுர்த்தி விழாவிற்கு தேவையான ஆப்பிள், ஆரஞ்சு, சீதாபழம், கொய்யாப் பழம், பேரிக்காய், வாழைப் பழம், வாழை மரம், எருக்கம்பூ மற்றும் அருகம்புல் மாலை போன்றவையும் அதிகளவில் விற்பனைக்காக தள்ளுவண்டி மற்றும் சாலையோரங்களில் வைத்திருந்தனர்.விநாயகர் சதுர்த்தி விழாவையொட்டி, பொதுமக்கள் பொருட்களை வாங்க ஆர்வத்துடன் குவிந்தனர். கடந்த, 3 நாட்களுக்கு முன்பு, ஒரு கிலோ குண்டு மல்லி பூக்கள், 500 முதல், 800 ரூபாய்க்கு விற்ற நிலையில், விநாயகர் சதுர்த்தி மற்றும் திருமண நிகழ்ச்சியையொட்டி, நேற்று குண்டு மல்லி ஒரு கிலோ, 2,200 ரூபாய், முல்லைப்பூ ஒரு கிலோ, 1,600 ரூபாய் என விற்பனையானது.