மேட்டூர் அணை நீர்மட்டம் நடப்பாண்டில் 2ம் முறை சதம்

மேட்டூர்: மேட்டூர் அணை நீர்மட்டம் நடப்பாண்டில், 2ம் முறை, 100 அடியை எட்டியது.மேட்டூர் அணையின் மொத்த நீர்மட்டம், 120 அடி. கர்நாடகா அணைகளில் திறக்கப்பட்ட நீர் தொடர்ச்சியாக வந்ததால் கடந்த ஜூலை, 3ல், 39.65 அடியாக இருந்த அணை நீர்மட்டம் படிப்படியாக உயரத்தொடங்கியது. ஜூலை, 27ல் அணை நீர்மட்டம், 100.41 அடியாக உயர்ந்தது. ஜூலை, 30ல் முழு கொள்ளளவான, 120 அடியை எட்டியது.பின் டெல்டா பாசனத்துக்கு தொடர்ச்சியாக நீர் திறந்ததால் கடந்த, 13ல் அணை நீர்மட்டம், 89.26 அடியாக சரிந்தது. தமிழகம் - கர்நாடகா எல்லையிலுள்ள காவிரி நீர்பிடிப்பு பகுதியில் பெய்த மழையால் மேட்டூர் அணை நீர்மட்டம் மீண்டும் அதிகரிக்கத்தொடங்கியது. நேற்று முன்தினம், 98.56 அடியாக இருந்த அணை நீர்மட்டம், 86 நாட்களுக்கு பின் நடப்பாண்டில், 2ம் முறையாக நேற்று காலை, 100.01 அடியாக உயர்ந்தது. நேற்று முன்தினம் வினாடிக்கு, 17,586 கனஅடியாக இருந்த அணை நீர்வரத்து, நேற்று, 29,850 கனஅடியாக உயர்ந்தது. டெல்டா பாசனத்துக்கு வினாடிக்கு, 7,500 கனஅடி நீர் திறக்கப்பட்டது. திறப்பை விட வரத்து கூடுதலாக உள்ளதால், வரும் நாட்களில் மேட்டூர் அணை நீர்மட்டம் மேலும் உயர வாய்ப்புள்ளது.