கீழ்மதுரை ரயில்வே ஸ்டேஷனில் பயணிகளுக்கு புதிய வசதிகள்

மதுரை : கீழ்மதுரை ரயில்வே ஸ்டேஷனில் பயணிகள் நலனுக்காக புதிதாக வசதிகள் அறிமுகப்படுத்தப்பட்டுள்ளது.இந்த ஸ்டேஷன் மதுரை - ராமேஸ்வரம் பாதையில் காமராஜபுரத்தில் அமைந்துள்ளது. மதுரையில் இருந்து 3 கி.மீ., துாரத்தில் அமைந்துள்ள இந்த ஸ்டேஷனில் ஒரு ரயில் பாதை மற்றும் நடைமேடை உள்ளது. தினமும் 300 பயணிகள் வரை பயன்படுத்தி வருகின்றனர். தினசரி முன்பதிவில்லாத பயணச்சீட்டு வருமானமாக ரூ. 6500 கிடைக்கிறது. மதுரை போன்ற நகரங்களில் இருந்து செல்லும் ரயில்களுக்கு இங்கு பயண சீட்டு முன் பதிவு செய்யப்படுகிறது. இதன் மூலம் தினமும் ரூ. 45 ஆயிரம் வருமானம் ஈட்டப்படுகிறது.இந்த ஸ்டேஷனில் 420 மீ., நீளத்தில் குறைந்த உயரம் உள்ள நடைமேடை அமைக்கப்பட்டுள்ளது. ஒரு ரயில் பெட்டி நீளத்திற்கு நடைமேடை மேற்கூரை உள்ளது. கழிப்பறை, குடிநீர் வசதி, மின்னணு கடிகாரம் போன்ற அத்தியாவசிய வசதிகளும் உள்ளன.தற்போது இந்த ஸ்டேஷனில் ரயில் வருகை, புறப்பாடு, விழிப்புணர்வு செய்திகள் ஆகியவற்றை பயணிகளுக்கு தெரிவிக்கும் வகையில் தானியங்கி பொது அறிவிப்பு வசதி ஏற்படுத்தப்பட்டுள்ளது. இதற்காக ஆறு ஒலிபெருக்கி கருவிகள் ரூ. 4 லட்சம் மதிப்பில் பொருத்தப்பட்டுள்ளது.தமிழ், ஆங்கிலம், ஹிந்தி மொழிகளில் பொது அறிவிப்புகள் தானியங்கி கருவி மூலம் ஒலிபரப்பாகிறது. பயணிகள் ரயில்களில் எளிதாக ஏறி, இறங்க ரூ. 68 லட்சம் செலவில் ரயில் பெட்டி வாசல் உயரத்திற்கு நடைமேடை உயர்த்தப்பட உள்ளது. இதற்கான டெண்டர் பெறப்பட்டு பரிசீலனையில் உள்ளது. விரைவில் பணிகள் துவங்க இருக்கிறது.